જાપાનના વૈજ્ઞાનિકોએ એવી શોધ કરી છે કે રસ્તે ચાલતાં વાહનો એની મેળે એકબીજા સાથે ‘વાતચીત’ કરીને ટ્રાફિકમાં રસ્તો શોધી લેશે !
જરા વિચારો, ભારતના રોડ ઉપર જે ‘ખીચડા’ જેવો ટ્રાફિક થાય છે એમાં વાહનો શું વાત કરતાં હશે ?
***
‘એય, મેં લાઇટ ઝબકાવીને તારી પાસે સાઈડ માગી ! તને દેખાયું નહીં ?’
‘ઓયે ! મેં વાઈપર ડાબે જમણ ફેરવીને ના પાડી ! એ તારે જોવું જોઈએ ને ?’
‘ક્યાંથી જુએ ? મારી આગળનો ખટારો કાળા કાળા ધૂમાડા કાઢે છે !’
‘એમાં મને શું કહે છે ? ગડકરીને ફરિયાદ કરને ?’
‘ગડકરીએ જ મારી ટાંકીમાં કંઈક એવું મિક્સ કર્યું છે કે સાલું, ઘેન ચડે છે !’
‘એ વાતોડીયણ કાર ! આગળ વધને ? આખા ગામની પંચાત અહીં ચાર રસ્તો જ કરવાની છે ?’
‘એય જીપડા ! સખણો રહે ! પાછળથી અડાડે છે શેનો ?’
‘હજી તો ખાલી અડાડી જ છે ! તું નહીં ખસે તો ઠોકી દઈશ !’
‘એમ ? તો તો હું છેડતી અને બળજબરી એમ બબ્બે કેસ કરીશ તારી સામે !’
‘જા જા ! છે તો લાલ રંગની ચકાચક કાર પણ લખ્ખણ તો સાવ રીક્ષાડી જેવાં જ છે !’
‘તું તારું જો જીપડાં ! પેલી રીક્ષાડી તારા નાક નીચેથી રોંગ સાઈડમં આગળ ઘૂસી ગઈ !’
‘એય રીક્ષાડી !! આ રસ્તો તારા બાપનો છે ?’
‘હાસ્તો ! અમે બધી રીક્ષાડીઓ અમારા પોલીસકાકાઓને તગડા હપ્તા આપીએ છીએ ! તારાથી થાય તે કરી લેજે !’
‘છીછીછી… તારામાંથી તો કેરોસીનની વાસ આવે છે ! શું ખાય છે રોજ ?’
‘એ પણ તારા ગડકરીને જ પૂછને ? હીહીહ હાહાહા…’
‘એમાં આટલી બધી નાચે છે શેની !’
‘નાચતી નથી ! રસ્તામાં ડિસ્કો ટાઈપના ખાડા છે !’
‘સાંભળ્યું જીપડા ? હવે ગડકરી આપણી ઉપર ડિસ્કોનો મનોરંજન ટેક્સ નાંખશે !’
‘પીંપીંપી…’ ‘ભોંભોં ભોં…’
‘લો વાગ્યું ડિસ્કોનું સરાઉન્ડ સાઉન્ડ મ્યુઝિક !’
***
- મન્નુ શેખચલ્લી
Comments
Post a Comment