ટ્રમ્પ સાહેબની જીદ અને ડેમોક્રેટ પાર્ટીની આડોડાઈને લીધે અમેરિકાનું શટડાઉન નવા નવા રેકોર્ડ તોડી રહ્યું છે !
એમાંય તાજેતરમાં થયેલી ચૂંટણીઓમાં ટ્રમ્પની પાર્ટીનાં સૂપડાં સાફ થઈ જવાથી ડેમોકેટ્સને વધારે શૂર ચડ્યું છે ! ત્યાંથી આવતા સમાચારો જોઈને હવે તો વિચાર આવે છે કે આના કરતાં ઇન્ડિયા શું ખોટું ? જુઓ…
***
કહે છે કે મફત અથવા સસ્તા ભોજનની કૂપનો બંધ થવાથી લગભગ ૪ કરોડ અમેરિકનો માથે ભૂખમરાનું સંકટ છે.
જ્યારે અહીં ભારતમાં તો છેલ્લાં પાંચેક વરસથી ૮૦ કરોડ લોકોને મફત અનાજ મળે છે !
બોલો, અમેરિકા સારું કે ઇન્ડિયા ?
***
શટડાઉનને કારણે લગભગ ૨૦ લાખ સરકારી કર્મચારીઓ એક મહિનાથી વગર પગારે ઘરે બેઠા છે !
જ્યારે અહીં તો દેશમાં લગભગ બે કરોડ મહિલાઓને નોકરી વિના, ઘેરબેઠાં બે -ત્રણ હજાર રૂપિયા મળે છે !
બોલો, અમેરિકા સારું કે ઇન્ડિયા ?
***
કહે છે કે શટડાઉનને કારણે અમેરિકન અર્થતંત્રને ૭૦૦ કરોડ ડોલરનું નુકસાન થશે. (લગભગ ૫૬૦૦૦ કરોડ રૂપિયા)
લો, માત્ર ૫૬૦૦૦ કરોડ ? આટલા રૂપિયા તો ભારતમાં કૌભાંડોમાં ખવાઈ જાય છે ! છતાં પબ્લિકને કોઈ અસર થતી નથી…
હવે બોલો, અમેરિકા સારું કે ઇન્ડિયા ?
***
એવું પણ કહે છે કે શટડાઉનને લીધે અબજો ડોલરના પ્રોજેક્ટો એક મહિનાથી અટકી પડ્યા છે.
બસ, એક જ મહિનો ? અહીં તો પાંચ પાંચ વરસ લગી ભલભલા પ્રોજેક્ટો પતતા જ નથી ! ઉપરથી કોન્ટ્રાક્ટરનો ભાવવધારાના પૈસા પણ ચૂકવાય છે !
તો અમેરિકા સારું કે ઇન્ડિયા ?
***
અને લોસ એન્જેલસમાં, જ્યાં સ્ટોર્સમાંથી ૧૦૦૦ ડોલર સુધીના માલ સામાનની લૂંટ કરો તો ફરિયાદ પણ લેવાતી નથી, ત્યાં લૂંટફાટની ઘટનાઓ વધી ગઈ છે !
બસ ? માત્ર ૧૦૦૦ ડોલર ? અહીં બેન્કોમાં તો ૧૦૦૦ કરોડ પણ ચણામમરા ગણાય છે !
તો બોલો, કોનું અર્થતંત્ર વધારે મજબૂત છે ? અમેરિકાનું કે ઇન્ડિયાનું ?
મેરા ભારત મહાન !
***
- મન્નુ શેખચલ્લી
Comments
Post a Comment