આજે ‘જ્ઞાન’ સૌથી સસ્તું છે ! જ્યાં જાવ ત્યાંથી મળે છે ! પણ બોસ, એ બધા જ્ઞાનના ફુગ્ગામાં એક જ ટાંકણી મારો ત્યાં જ્ઞાનનો ફૂગ્ગો ફટી જાય છે ! જુઓ…
***
જ્ઞાન :
દુનિયામાં આપણે ખાલી હાથે આવીએ છીએ અને ખાલી હાથે જવાનું છે.
ટાંકણી :
એ તો બરાબર, પણ ખાલી હાથે જીવવું શી રીતે ? હાથમાં મોબાઈલ વિના ?
***
જ્ઞાન :
ઉપરવાળો બધું જુએ છે.
ટાંકણી :
ભલેને જોતો ? એ ક્યાં આપણા વિડીયો ઉતારીને વાયરલ કરવાનો છે ?
***
જ્ઞાન :
બૂરે કામ કા બૂરા નતીજા.
ટાંકણી :
અચ્છા ? તો પછી આ બધા વકીલોને શેના માટે રાખ્યા છે ?
***
જ્ઞાન :
જોયું ? મોત કોઈપણ ક્ષણે આવી શકે છે…
ટાંકણી :
પણ સાહેબ, ઇન્શ્યોરન્સની સિસ્ટમ એટલા માટે જ તો ચાલુ કરી છે !
***
જ્ઞાન :
પૈસા વડે સુખ ખરીદી શકાતું નથી.
ટાંકણી :
હા, પણ હજી સુધી કોઈએ પોતાનું સુખ ‘વેચવા’ કાઢ્યું ?
***
જ્ઞાન :
લાઇફ બિગિન્સ એટ સિક્સ્ટી.
ટાંકણી :
જો એવું જ હોત તો સિનિયર સિટીઝનો માટે બાલમંદિરો ચાલતાં હોત !
***
જ્ઞાન :
ત્રીજા વિશ્વયુદ્ધની ખબર નથી, પણ ચોથું વિશ્વયુદ્ધ પથ્થરો વડે લડાશે.
ટાંકણી :
એવું છે ? તો અત્યારથી માળિયામાં પથ્થરોનો સ્ટોક ભરી રાખોને !
***
જ્ઞાન :
શુધ્ધ હૃદયથી કરેલી દરેક પ્રાર્થના જરૂરથી ફળે છે.
ટાંકણી :
એવું હોય ? જો કોઈનું કોલેસ્ટ્રોલવાળું હાર્ટ હોય તો ના ફળે ? જરા પૂછાવી જોજોને…
***
- મન્નુ શેખચલ્લી
Comments
Post a Comment