તમે માર્ક કરજો, તમે ટોલ-ટેક્સ માટે જે લાઈનમાં જોડાઓ છો કે તરત એ લાઈન સૌથી ધીમી પડી જાય છે !
જી હા, આ ‘બૅડ-લક’નો અફર નિયમ છે ! આ સિવાય પણ બીજા ઘણા નિયમો છે…
***
ઇમ્પોર્ટન્ટ વસ્તુનો નિયમ :
જે ચીજને તમે બરોબર ‘સાચવી’ને બિલકુલ ‘ઠેકાણે’ રાખી હોય તે ચીજ ખરે ટાઈમે તમને મળતી જ નથી !
***
ઇમ્પોર્ટન્ટ વ્યક્તિનો નિયમ :
જે વ્યક્તિ ખૂબ જ ઇમ્પોર્ટન્ટ હોવા છતાં તમને સામે ચાલીને મળવા આવે… એવું ફક્ત ચૂંટણી વખતે બને છે !
***
મદદનો નિયમ :
‘કંઈ પણ મદદની જરૂર હોય તો કહેજો’ એવું કહેનારા પાસે જ્યારે તમે પૈસાની મદદ માગો ત્યારે જ તેના પૈસા બીજે કયાંક ‘ફસાયેલા’ હોય છે !
***
ઓફિસ-ટાઈમનો નિયમ :
જે દિવસ તમે ઓફિસમાં લેટ પહોંચો છો એ જ દિવસે બોસ ટાઈમસર આવેલા હોય છે !
***
રોંગ નંબરનો નિયમ :
જ્યારે તમે ભૂલથી રોંગનંબર લગાડો છો ત્યારે તે કદી ‘બિઝી’ હોતો નથી… પરંતુ…
અજાણ્યા નંબરનો નિયમ :
ફોન પર ધંધો મળશે એમ સમજીને તમે જે સત્તર અજાણ્યા નંબરના ફોનો ઉપાડી લો છો એ તમામ ‘ચીટકુ’ માર્કેટિંગવાળાના જ નીકળે છે !
***
બોસના ફોનનો નિયમ :
જ્યારે તમે ગરમાગરમ ચાનો કપ લઈને શાંતિથી ચૂસ્કીઓ મારીને પીવાના મૂડમાં હો ત્યારે જ બોસનો ફોન આવે છે ! ...અને તે ચા ઠંડી પડી જાય ત્યાં સુધી ચાલે છે !
***
મશીન રિપેરીંગનો નિયમ :
જ્યારે તમારા બંને હાથ ગ્રીઝ કે ઓઇલથી ખરડાયેલા હોય ત્યારે જ તમને નાક ઉપર ખંજવાળ આવશે !
***
લગ્નનો નિયમ :
પચ્ચીસ ઠેકાણાં જોયાં પછી લગ્ન માટે જે છોકરી માટે કે છોકરા માટે તમે ‘હા’ પાડી હતી એ જ તમારી પત્ની કે પતિ બને છે ! છતાં…
છતાં આખી જિંદગી તમે વાંક તો ‘નસીબ’નો કાઢો છો ! પણ આ જ નિયમ છે, શું થાય ?
***
- મન્નુ શેખચલ્લી
Comments
Post a Comment