સમાચારોમાં... મમરા !

ઘણીવાર સમાચારો બહુ ‘હેવી’ હોય છે પરંતુ તેને ‘ડાયજેસ્ટ’ કરવા માટે ઉપર ‘મમરો’ મુકવાની જરૂર હોય છે ! જેમ કે…

*** 

સમાચાર :

મહારાષ્ટ્રમાં મુખ્યમંત્રી કોણ બનશે એ નક્કી કરવામાં ૧૧ દિવસ થયા.

મમરો :

એનું કારણ એ હોઈ શકે કે તેના માટે બેલેટ પેપરથી મતદાન થયું હશે, એટલે ગણવામાં આટલી વાર લાગી !

*** 

સમાચાર :

દ. કોરિયામાં પ્રેસિડેન્ટે માર્શલ-લો લગાવ્યો અને માત્ર છ કલાકમાં પાછો ખેંચી લીધો.

મમરો :

આને માર્શલ ‘વાપસ-લો’ કહેવાય !

*** 

સમાચાર :

અભિનેતા વિક્રાંત મેસીએ ખુલાસો કર્યો છે કે તે ‘રિટાયર નથી થવાનો, તે માત્ર થોડો ‘બ્રેક’ લેવા માગે છે.’

મમરો :

કાશ… તુષાર કપૂર, અર્જુન રામપાલ, અભિષેક બચ્ચન અને ઐશ્ર્વર્યા રાય પણ આવો ખુલાસો કરે કે એમણે ‘બ્રેક’ નથી લીધો, એ હવે ‘રિટાયર’ થઈ ગયાં છે ! (કેમકે પ્રેક્ષકોમાં હજી એમનો ખૌફ છે.

*** 

સમાચાર :

જો બાઈડને એના પોતાના દિકરાને ભ્રષ્ટચાર કેસમાં ‘માફ’ કરી દીધો !

મમરો :

એ હિસાબે સોનિયાજી કેટલાં મહાન કેવાય ? ૨૮ ચૂંટણીઓ હારવા છતાં એમણે પોતાના દિકરાને માફી નથી આપી !

*** 

સમાચાર :

કોંગ્રેસના સાંસદોએ ‘મોદી-અદાણી એક હૈં’વાળાં સુત્રો વડે વિરોધ પ્રદર્શન કર્યું.

મમરો :

યાર, આ લોકોને હજી કેમ સમજ નથી પડતી ? મોદીજી દોઢ મહિના પહેલાં જ કહી ચૂક્યા છે : ‘એક હૈં તો સેફ હૈં !’

*** 

સમાચાર :

ટ્રમ્પે ટકોર કરી છે કે કેનેડા અમેરિકાનું એકાવનમું રાજ્ય બનીને અમેરિકામાં જોડાઈ શકે છે.

મમરો :

આહાહા… જો એમ થાય તો ભારતીય નાગરિકોની ઘૂસણખોરી અડધી થઈ જાય ! કેમકે અત્યારે તો પહેલાં કેનેડામાં, અને પછી ત્યાંથી અમેરિકામાં, એમ ડબલ-ડબલ ઘૂસણખોરી કરવી પડે છે ને !

***

- મન્નુ શેખચલ્લી