સમાચારોમાં ભોળા સવાલો !

અમુક સમાચારો જ એવા હોય છે કે એમાં અમારા જેવા બબૂચકને બહુ ભોળા સવાલો થવા લાગે છે ! દાખલા તરીકે….

*** 

સમાચાર :

ગુજરાત સરકાર અંધશ્રદ્ધા વિરોધી કાયદો લાવશે.

ભોળો સવાલ :

મોદી સાહેબ બોલ્યા હતા કે ‘હું કદાચ ‘નોન - બાયોલોજીકલ’ જીવ (અવતારી પુરુષ) છું એવું મને લાગે છે’… તો એમની ઉપર આ કાયદો લાગુ પડે ખરો ?

*** 

સમાચાર :

મહારાષ્ટ્રના બદલાપુર ગામની સ્કુલમાં બાલમંદિરની બાળાઓ ઉપર ત્યાંના પટાવાળાએ પાશવી દુષ્કર્મ કર્યું. તેના વિરોધમાં લોકોએ થાણે સ્ટેશન પર જઈ અનેક ટ્રેનો અટકાવી દીધી.

ભોળો સવાલ :

આખી વાતમાં ટ્રેનોનો શું વાંક ? કોઈ કહેશે ?

*** 

સમાચાર :

કોલકતાના રેપ-મર્ડર કેસમાં સુપ્રીમ કોર્ટે બધાને ખખડાવી નાંખતાં પૂછ્યું : ‘પોલીસ, હોસ્પિટલ અને પ્રિન્સીપાલ શું કરી રહ્યા હતા ?’

ભોળો સવાલ :

આવું તો છેલ્લા છ દિવસથી આમ જનતા, મિડીયા, ડોક્ટરો, વિપક્ષો અને સીબીઆઈ પણ પૂછી રહ્યા છે ! હવે સુપ્રીમ કોર્ટ પૂછશે તો શું કેસ ઉકલી જવાનો છે ?

*** 

સમાચાર :

રશિયાએ દાવો કર્યો છે કે યુક્રેન હવે રશિયાનાં ન્યુક્લિઅર પાવર પ્લાન્ટ ઉપર હૂમલો કરવાની ફિરાકમાં છે. 

ભોળો સવાલ :

રાહુલ ગાંધી પણ આવું જ કંઈક બોલ્યા હતા ને, કે હવે મારી ઉપર ઈડીની રેડ પડશે ! પછી પડી ? સ્ટ્રેટેજી સરખી નથી લાગતી ?

*** 

સમાચાર :

કોલકાતા રેપ-મર્ડર કેસના આરોપીનો લાઈ ડિટેક્ટર ટેસ્ટ કરવામાં આવશે.

ભોળો સવાલ :

આવા ટેસ્ટ ક્યારેય કોઈ નેતાઓના કેમ નથી થતા ? જનતા જાણવા માગે છે.

***

- મન્નુ શેખચલ્લી