ગઈકાલે જે છાપાંઓની ભાષાના મુહાવરાની વાત કરી હતી તેને આજે આગળ વધારીએ…? જુઓને છાપામાં છપાતી ભાષા એની મેળે જ ક્યારે રમૂજ પેદા કરી નાંખે છે !
***
દાખલા તરીકે દિલ્હીની પાણી સમસ્યાના સમાચારો જ લઈ લો...
- પાણી-માફિયાઓ કોર્ટના આદેશને ‘ઘોળીને પી ગયા...’
- પ્રજા ન્યાય માટે ‘તરસી’ રહી છે...
- શું આખા મામલે લાંચના નાણાંની ‘રેલમછેલ’ જવાબદાર છે ?
- હકીકત શું છે ? અફવાઓનું ‘ઘોડાપૂર’...
- વિપક્ષી નેતાઓ ‘જામીને વરસ્યા’ દિલ્હીની સરકાર ઉપર.. (‘જમકર બરસે’નો અનુવાદ !)
- જવાબ આપવાને બદલે ‘પાણીમાં બેસી ગઈ’ દિલ્હી સરકાર...
- છેવટે મિડીયા દ્વારા ‘ભીનું સંકેલવાનો પ્રયાસ...’
(જોયું ? પાણીને લગતા તમામ રૂઢિપ્રયોગો પાણીના જ સમાચારોમાં કેવા ફની લાગે છે !)
***
(આ રીતે આંખ અને કાન પણ કેવા ઊંધા ભરાય છે તે જુઓ...)
- આઈ હોસ્પિટલના કૌભાંડ સામે અદાલતે કરી ‘લાલ આંખ’ !
(આ ‘લાલ આંખ’ તો એટલી બધી વાર થાય છે કે અદાલતે હવે આઈ-ચેક-અપ કરાવી લેવાની જરૂર છે.)
- સરકારી આઈ હોસ્પિટલમાં ‘આંધળે બહેરું કૂટાયું...’ આંખની હોસ્પિટલમાં કાનની દવાઓ ખરીદાઈ !
- દરદીઓની ફરિયાદ ‘બહેરા કાને’ અથડાય છે !
- સરકાર કરી રહી છે ‘આંખ આડા કાન’...!
- આ છે આઈ હોસ્પિટલનો ‘આંખે દેખ્યો અહેવાલ’...
- આઈ હોસ્પિટલ મામલે સરકારની ‘આંખો ક્યારે ઉઘડશે ?’
- તંત્રને ‘અંધારામાં રાખીને’ ખેલાયો આખો ખેલ...
- ઉચ્ચ અધિકારીઓનાં અંદરોઅંદર ‘આંખ-મિચામણાં !’
***
(આવું જ ‘ખાવા’ની બાબતમાં થાય છે ! જેમ કે...)
- મધ્યાહન ભોજનમાં ચાલી રહી છે ‘ખાયકી...’
- બાળકોનું બજેટ અધિકારીઓ જ ‘ખાઈ ગયા’...
- ખાતાકીય તપાસને નામે ‘લાંચ ખાતા’ પકડાયા અધિકારી...
- ખુદ મંત્રીશ્રીએ કરી માર્મિક ટકોર : ‘કયું ખાતું’ ખાતું નથી ?
(રહી રહીને સાહેબનો ડાયલોગ યાદ આવે છે કે ‘ખાતો નથી, ખાવા દેતો નથી !’)
***
(અમુક સમાચારોમાં રસોડું પણ આવી જાય છે, જુઓ...)
- મંત્રીશ્રીએ ‘મમરો’ મુક્યો હતો...
- પણ અધિકારીઓએ ‘ભાંગરો વાટ્યો’...
- જેના લીધે નેતાજીને ‘મરચાં લાગ્યાં’...
- અને અભિનેત્રીની ‘જીભ લપસી’...
- આ બધામાં મિડીયાને મળ્યો ‘મસાલો’...
***
- મન્નુ શેખચલ્લી
Comments
Post a Comment