આ વખતની ચૂંટણીઓમાં જે રીતે ભાષણબાજી થઈ રહી છે એ જોતાં તો એમ થાય છે કે ભાઈ, આ ચૂંટણી છે કે હોરર ફિલ્મ ફેસ્ટિવલ ?
બધા પક્ષો આપણને ડરાવી જ રહ્યા છે ! જુઓ…
***
કોંગ્રેસે કહ્યું કે અમે દેશમાં સંપત્તિનો સર્વે કરાવીશું ! કેમકે ગરીબના પૈસા અમીરોએ દબાવી રાખ્યા છે ! અમે એ પૈસા પાછા અપાવીશું...
(મતલબ કે હોરર ફિલ્મ : ‘તહેખાના’)
***
ત્યાં તો ભાજપે બૂમો પાડવા માંડી કે કોંગ્રેસ તમારી સંપત્તિ, રૂપિયા, ઘરેણાં, મંગળસૂત્ર બધું છીનવીને દસ બાળકોવાળાં લોકોને આપી દેશે !
(મતલબ કે... ‘દો ગઝ જમીન કે નીચે’)
***
કોંગ્રેસે ડર ફેલાવ્યો કે ભાજપ આવશે તો લોકશાહી ખતમ થઈ જશે ! હવે પછી ચૂંટણીઓ જ નહીં થાય ! આ ‘ખાનગી’ એજન્ડા છે...
(મતલબ કે ‘રાઝ’)
***
ભાજપે બીવડાવવા માંડ્યું કે કોંગ્રેસ આવશે તો ફરી ઠેર ઠેર બોમ્બ ફૂટતા થઈ જશે !
(ફિલ્મ : ‘ખૂની પંજા’)
***
ભાજપે બંગાળમાં કહ્યું કે અહીંના ગુન્ડા રાજને ખતમ કરવું હોય તો ભાજપને લાવો...
(ફિલ્મ : 'ડરના મના હૈ' )
***
સામે મમતા બેનરજીએ કહ્યું કે ભાજપના ગુન્ડાઓ જ ડર ફેલાવે છે ! ખબરદાર એમને વોટ આપ્યો છે તો !
(ફિલ્મ : ‘ડરના જરૂરી હૈ’)
***
પછી તો ‘ડર’ ફિલ્મની સિરીઝ ચાલી...
‘ભાજપના રાજમાં ભય છે ! પણ અમે ડરતા નથી...’
(ડર – ૧)
‘કોંગ્રેસ ડરી ગઈ છે એટલે લવારા કરે છે !’
(ડર – ૨)
‘ભાજપ હાર ભાળી ગયું છે એટલે બખાળા કાઢે છે !’
(ડર – ૩)
‘ડરીને રાયબરેલીમાં લડવા આવ્યા.’
(ડર – ૪)
‘મોદી ગુજરાતથી ડરી ગયા છે એટલે વારાણસીમાં બેઠા છે !’
(ડર – ૫)
***
‘કોંગ્રેસ ફરી કલમ ૩૭૦ લાવશે... રામમંદિર ઉપર ‘બાબરી તાળું’ લગાડી દેશે !’
(‘પુરાના મંદિર’... ‘દહેશત’)
***
એવામાં રાજનાથ સિંહ બોલ્યા કે એક દિવસ પીઓકે ભારતમાં ભળી જશે... આ સાંભળીને ફારુખ અબ્દુલ્લાએ તો ‘હોરર-વૉર’ મુવી બતાડી દીધી !
કહેવા લાગ્યા : ‘પાકિસ્તાને બંગડીઓ નથી પહેરી ! પરમાણુ બોમ્બ પડશે તો અહીં જ પડશે !’ બોલો.
- દરમ્યાનમાં મતદારો (અડધી ઊંઘમાં) ‘યાર... ગરમી બહુ છે ! છોડને, મતદાન નથી કરવું !’
***
- મન્નુ શેખચલ્લી
Comments
Post a Comment