ગુજરાતમાં ચૂંટણીની ગરમી કરતાં ઉનાળાની ગરમી વધારે છે ! આવી ગરમીમાં ભલભલા તત્વચિંતકોને પણ જીવનની જુદી જ સચ્ચાઈ દેખાવા લાગે છે ! જુઓ એના નમૂના…
***
જેણે ગયા જનમમાં પૂણ્યનાં કામો કર્યાં હશે તેને આ જનમમાં એકાદ એર-કન્ડીશન્ડ ઓફિસમાં પટાવાળાની નોકરી જરૂર મળે છે !
***
અને જેનાં ગયા જનમનાં પૂણ્યો ઓછાં પડ્યાં હશે એ બિચારો આ જનમમાં બરફગોળાની લારી ચલાવી ખાય છે !
***
હજી સાંભળો... જેણે ગયા જનમમાં ‘પાછલી’ ઉંમરે બહુ પાપ કર્યાં હશે...
- તેના સ્કુટરના આ જનમમાં કદી ‘છાંયડામાં’ પાર્કિંગની જગ્યા મળશે નહીં !
(ફરીથી વાંચો, ‘પાછળથી’ ટ્યુબલાઇટ થશે.)
***
ફ્રીજમાં પાણીના બાટલા ભરીને પાછા ન મુકનાર છોકરાને તો આ જ જનમમાં સજા મળે છે...
જ્યારે તે મોટો થઈને ડ્રીંક લેવા બેસે ત્યારે તેને કદી ‘ઠંડી’ સોડા મળતી નથી !
***
ઉનાળાનું પ્રખર સત્ય :
બગડેલા એસીવાળી કેબિનમાંથી બહાર આવેલા બોસ અને ભરબપોરે તડકામાંથી ઘરેમાં આવેલી પત્ની સાથે... કોઈ માથાકૂટ કરવી નહીં !
***
ઉનાળાનું ઊંડુ સત્ય :
આવા ઉનાળામાં પોતાના ‘પરસેવાની કમાણી’ માત્ર બે જ જણ ખાય છે...
એક, બેકરીની ભઠ્ઠીમાં પાંઉનો લોટ બાંધનારો કારીગર અને બીજો બપોરના ટાઇમે ચાર રસ્તે ડ્યૂટી બજાવતો ટ્રાફિક પોલીસ !
***
ચેતવણી :
સાંજે સાડા ચાર વાગે ફૂટપાથ ઉપર મુકેલા સિમેન્ટના બાંકડા ઉપર ભલે છાંયડો દેખાતો હોય, છતાં એની ઉપર બેસતાં પહેલાં સો વાર વિચાર કરવો...
- કેમકે હજી સવા ચાર સુધી તો એ બાંકડો તડકામાં હતો !
***
- મન્નુ શેખચલ્લી
Comments
Post a Comment