ક્યારેક વિચારો આવે છે કે...

સંસ્કૃતમાં મનને મર્કટ અર્થાત્‌ વાંદરુ કહ્યું છે ! અમારું મન પણ એક ઠેકાણે કદી ટકતું નથી. એટલે જ ક્યારેક એકસામટા ઠેકડા મારે છે ! જુઓને…

*** 

ક્યારેક વિચાર આવે છે...

કે ED અને ઇન્કમટેક્સના દરોડા કદી ભાજપના નેતાઓ ઉપર કેમ પડતા નથી ?

*** 

અને ક્યારેક વિચાર આવે છે...

દિપીકા પદુકોણ પ્રેગનન્ટ છે એ વાતે લાખો દેશવાસીઓ શેના હરખઘેલા થઈ ઊઠે છે ?

*** 

એટલે જ વિચાર આવે છે...

કે ગાઝામાં અત્યાર સુધી 30,000 નાગરિકોનાં મોત થયાં છે એ વાતે હવે પેલાં વિરોધ સરઘસો કેમ નથી નીકળતાં ? બધા એટલા બધા બિઝી છે ?

*** 

અમસ્તાં વિચાર આવે છે...

કે જો શિયાળો જતો નથી, ઉનાળો આવતો નથી, અને ગમે ત્યારે માવઠાં થાય છે... તો આને કઇ સિઝન કહેવાય ?

*** 

સિરિયસલી વિચાર આવે છે..

કે ભારતના ગગનયાનમાં જે અવકાશયાત્રી જવાના છે એમના વીમા કઈ કંપનીએ ઉતાર્યા હશે ?

*** 

મજાક મજાકમાં વિચાર આવે છે...

કે લસણના ભાવ રાતોરાત 50 રૂપિયા ઘટી જશે... એવા ‘ફેક ન્યુઝ’ પણ કેમ ફેલાતા નથી ?

*** 

બાકી વિચાર તો આવે છે...

કે જામનગરમાં ‘ગિફ્ટ-સિટી’ સિસ્ટમ વિના આટલા બધા ફિલ્મી કલાકારો કેમ દોડી આવ્યા હસે ? માત્ર દાળ-કઢી પીવા ?

*** 

અને વિચાર આવે છે...

કે જામનગરમાં એ ભવ્ય લગ્નની ટીકા રાહુલ ગાંધી ક્યારે કરશે ? બહુ રાહ જોવડાવી ભઈએ...

*** 

છોડો, વિચાર એવો આવે છે..

કે ‘એલોપથી’ વડે ફલાણો રોગ મટે છે અને ઢીંકણો ગેરંટીથી કાબૂમાં આવી જાય છે... એવા મેસેજો કેમ કદી આવતા નથી ?

*** 

અને છેલ્લે

વિચાર આવે છે કે AI આવી ગયા પછી આપણે જાતે વિચારો કરવાના કે નહીં ? બહુ લોચા છે યાર...

***

- મન્નુ શેખચલ્લી