આપણે મોબાઈલમાં રીંગટોન તરીકે ફિલ્મી ગાયનો રાખીએ તો છીએ પણ ક્યારેક એવી જગ્યાએ એ રીંગટોન વાગવા લાગે છે કે એની મેળે કોમેડી થઈ જતી હોય છે ! જુઓ…
***
વરરાજા પરણવા માટે જાન લઈને નીકળ્યા છે એ જ વખતે એની ગર્લફ્રેન્ડનો ફોન આવે છે અને રીંગટોનમાં ગાયન વાગે છે :
‘તૂ જહાં જહાં ચલેગા,
મેરા સાયા સાથ હોગા...
મેરા સાયા... મેરા સાયા... મેરા સાયા..’
***
બીજો એક વરરાજા પરણીને નવી દુલ્હનને પોતાની સાથે બેસાડીને પાછો વળી રહ્યો છે, ત્યારે એક ફોન આવે છે અને રીંગટોનમાં ગાયન વાગે છે :
‘દિલ મેં છૂપાકર પ્યાર કા તૂફાન લે ચલે,
હમ આજ અપની મૌત કા સામાન લે ચલે...’
***
એક બોયફ્રેન્ડ રાતના ટાઇમે સંતાતો છૂપાતો એની ગર્લફ્રેન્ડને મળવા જઈ રહ્યો છે. એ જ વખતે એના દોસ્તનો ફોન આવે છે... અને રીંગટોનમાં ગાયન :
‘અકેલે અકેલે કહાં જા રહે હો ?
હમેં સાથ લે લો જહાં જા રહે હો...’
***
છોકરો ડેટિંગ એપ દ્વારા છોકરીને મળવા માટે પહેલીવાર ગયો છે. બન્ને એક રેસ્ટોરન્ટમાં મળે છે. છોકરી પૂછે છે ‘તમારું નામ શું ?’ એ જ વખતે ફોનમાં રીંગટોન ચીસ પાડીને ગાઈ ઊઠે છે :
‘આશિક હું મૈં મહજબીં કા,
લોગ કહે મુઝે પગલાં કહીં કા...’
***
પતિ પત્ની વચ્ચે ઝગડો થઈ ગયો છે. પત્ની રીસાઈને પિયર જવાની તૈયારી કરી બેઠી છે. પતિ હજી પત્નીને મનાવવાની શરૂઆત કરવા જાય છે ત્યાં જ ફોનમાં રીંગટોન...
‘જાના હૈ તો જાઓ, મનાયેંગે નહીં,
નખરે કિસી કે ઉઠાયેંગે નહીં...’
***
તમે કોઈની સ્મશાનયાત્રામાં ગયા છો,. સ્વર્ગસ્થની નનામી પાછળ ચાલતાં ચાલતાં તમે સ્મશાનમાં દાખલ થાઓ છો... એ જ વખતે તમારો ફોન ગાવા લાગે છે...
‘યે કહાં આ ગયે હમ ?
યૂં હી સાથ ચલતે ચલતે ?’
***
- મન્નુ શેખચલ્લી
Comments
Post a Comment