બિઝનેસ માટે નવી લિકર પોલીસી !

ગિફ્ટ સિટીમાં દારૂની છૂટ શા માટે આપી છે ? જેથી કરીને રાજ્ય બહારના અને દેશ બહારના બિઝનેસમેનોને આકર્ષી શકાય એટલે જ ને ? તો સાહેબો, અમારું સૂચન છે કે આ જ પોલીસી આગળ ધપાવો...

*** 

GSTને લિન્ક કરો...

જે રીતે આધારકાર્ડને બેન્ક ખાતા સાથે લિન્ક કરવું જરૂરી છે એ જ રીતે GSTને લિકર પોલીસી સાથે લિન્ક કરો !

જે વેપારી 5000 રૂપિયાથી વધારે GST ભરે છે, તેને દર 5000 રૂપિયાના GST ભરવા ઉપર 1 બોટલની પરમિટ આપો !

પછી જુઓ, ગુજરાતનું GST કલેક્શન કેવા ઐતિહાસિક રેકોર્ડ સર્જે છે !

*** 

મન્ચિંગ ઉદ્યોગને લિન્ક કરો...

આમેય બે બાટલી લઈએ છીએ ત્યારે તળેલા કાજુ, શિંગભૂજિયાં, દાળમૂઠ, તીખી સેવ, ચનાચોર ગરમ... વગેરે મળીને એકાદ કિલોનું તો મન્ચિંગ થઈ જ જાય છે ને ?

તો સિસ્ટમ સ્હેજ ફેરવી નાંખો ! જ્યારે જ્યારે ગ્રાહક બે કિલો જેટલું મન્ચિંગ ખરીદે ત્યારે તેને એક બાટલીની પરમિટ આપી જ દેવાની !

પછી તમે જુઓ, ગુજરાતનો નાસ્તા ઉદ્યોગ કેવી હરણફાળ ભરે છે ! અરે, મગફળીના તો ‘ટેકા’ના ભાવ પણ ડબલ થઈ જશે !

*** 

ટુરિઝમ ઉદ્યોગને લિન્ક કરો...

ગિરના જંગલમાં જાવ ત્યારે શું માત્ર સિંહ અને બાંધેલો પાડો જ જોવાનો ?

સાપુતારા જઈએ ત્યારે શું માત્ર ધોધ અને ઝાડવાં જોવાનાં ?

પાવાગઢ જઈએ ત્યારે શું માત્ર રોપ-વેમાં જ આટાં મારવાના ?

અને શિયાળામાં જે કચ્છનો રણોત્સવ થાય છે ત્યાં શું ધાબળા ઓઢીને ઊંટો જ જોયા કરવાના ?

આ તમામ સ્થળે ટુરિઝમ ઉદ્યોગને પ્રોત્સાહન મળે એટલા માટે દરેક પ્રવાસીને... (બોલો, કેટલું ઝડપથી સમજી ગયા ?)

*** 

મેડિકલ ઉદ્યોગને પણ..

કિડનીની હોસ્પિટલો શા માટે બાકી રહી જાય ? લોકો આટલો દારૂ પીશે તો કીડનીનાં દર્દો માટે પણ પેકેજો હોવાં જોઈએ ને ? સ્કીમ એવી હશે કે જો તમારો સ્કોર 300 બાટલીથી ઉપર થઈ જાય તો કિડનીનાં ઓપરેશનનો અડધો ખર્ચ સરકાર ઉઠાવશે ! ચિયર્સ... !!

***

- મન્નુ શેખચલ્લી