પાંચ રાજ્યોની ચૂંટણીના પરિણામો આવી ગયા પછી શક્ય છે કે છાપાંઓમાં આ ટાઇપની ટચૂકડી જાહેરખબરો આવી શકે છે…
***
ફટાકડાનો સ્ટોક કાઢવાનો છે
એક્ઝિટ પોલના ભરોસે રહીને જંગી પ્રમાણમાં ખરીદેલા ફટાકડાનો આખો સ્ટોક વપરાયા વિનાનો પડ્યો હોવાથી સસ્તા ભાવમાં કાઢવાનો છે. લગ્ન, બર્થ-ડે કે ક્રિકેટ મેચમાં ભારતના વિજય પછી કામમાં આવી શકે તેવા તરોતાજા અને જોરદાર ફટાકડા ડિસ્કાઉન્ટમાં મેળવવા માટે સંપર્ક કરો: કોંગ્રેસ કાર્યાલય, રાયપુર, છત્તીસગઢ.
***
ઘટાડેલા ભાવે રિસોર્ટ મળશે
એક્ઝિટ પોલ પછી તેલંગાણા તથા નજીકનાં રાજ્યોમાં આવેલા રિસોર્ટના જે ભાવો વધારવામાં આવ્યા હતા તેમાં હવે જંગી છૂટ!! ખાસ આકર્ષણ... છત્તીસગઢથી મંગાવેલા ફટાકડાની ભવ્ય આતશબાજી !!
***
વેચવાના છે ગેસના બાટલા
દોડો... દોડો...! જલ્દી કરો...! માત્ર 500 રૂપિયામાં ગેસનો બાટલો ! રાજસ્થાન કે મધ્યપ્રદેશમાંથી રોજ ખરીદો અને ગુજરાતમાં બમણા ભાવે વેચો ! 100 ટકા નફાના આ ધંધાની એજન્સી મેળવવા માટે બંધ કવરમાં ઓફરો મોકલવી. કમિશનનો આંકડો ગુપ્ત રહેશે.
ખાસ નોંધ : CM ઓફિસના નકલી અધિકારીઓથી સાવધાન !
***
જ્યોતિષીઓ જોઈએ છે
કોઈની શેહ-શરમમાં આવ્યા વિના આવનારી પેટા-ચૂંટણીઓ તથા 2024ની લોકસભાની ચૂંટણીનાં પરિણામોની સાચી આગાહી કરી શકે તેવા કાબેલ, અનુભવી તથા સત્યવાદી જ્યોતિષીઓ જોઈએ છે. તાત્કાલિક સંપર્ક કરો : XYZ પોલ સર્વે કંપનીનો.
***
વાયરલ ભક્તો જોઈએ છે
‘ફલાણા નેતાને તાત્કાલિક દિલ્હી બોલાવાયા છે અને CM તો એ જ બનવાના છે’... એવા વિડીયો લાખોની સંખ્યામાં વાયરલ કરી શકે એવા ભક્તો અથવા ભક્તો લાવી આપનાર એજન્સીની અરજન્ટમાં જરૂર છે.
મળો : ભાજપના મિડીયા સેલની પાછળની ગલીમાં.
***
- મન્નુ શેખચલ્લી
Comments
Post a Comment