બે જ શબ્દોની બબાલ !

નવા સંસદ ભવનના ઉદ્‌ઘાટન નિમિત્તે સાંસદોને જે બંધારણના પુસ્તકોની નકલ આપવામાં આવી છે એમાં બે શબ્દો ગાયબ છે... 'સોશિયાલિસ્ટ' અને 'સેક્યુલર'. એમાં તો મોટો હોબાળો થઈ ગયો !

અમે કહીએ છીએ કે ભઈ, જ્યાં જુઓ ત્યાં બે શબ્દોની જ બબાલ છે !

*** 

તમે ભાજપને કહો કે બસ બે શબ્દો બોલવાનું બંધ કરો...

(1) પરિવારવાદ અને (2) પપ્પુ

- તો કેટલો બધો ફેર પડી જાય ?

*** 

તમે કોંગ્રેસને કહો કે યાર, તમે પણ બે શબ્દો ના બોલો...

(1) મોદી અને (2) ગોદી મિડીયા

- તો કેટલો કકળાટ ઓછો થઈ જાય ?

*** 

અરે, સરકારને કહો કે બસ, બે જ ટેક્સ ગાયબ કરો...

(1) GST અને (2) ઈન્કમટેક્સ

- તો પ્રજા કેટલી સુખી થઈ જાય ?

*** 

તમે ઝુકરબર્ગને અને એલન મસ્કને કહો કે ફેસબુક, વોટ્સએપ અને ટ્વિટરમાંથી માત્ર બે જ શબ્દો ગાયબ કરી દે...

(1) દેશદ્રોહી અને (2) હિન્દુવિરોધી

- તો કેટલો બધો ઘોંઘાટ ઓછો થઈ જશે ?

*** 

જોકે અર્નબ ગોસ્વામીને ખાસ વિનંતી કરવી પડે કે બે નહીં, ચાર શબ્દો પડતા મુકો...

(1) નેશન (2) વોન્ટ્સ (3) ટુ (4) નો!

- તો બોલો, એ ચેનલ ઉપર કેટલી મસ્ત શાંતિ થઈ જાય ?

*** 

કંગના રાણાવતની બોલીવૂડ ગેંગને રિક્વેસ્ટ કરવાની કે બે શબ્દો ના બોલો...

(1) નેપોટિઝમ અને (2) કરણ જોહર

- તો બાકીની બોલીવૂડ ગોસીપ કેટલી સ્વીટ લાગે ?

*** 

અને મોદી સરકાર માત્ર બે નામ ઉપર ચોકડી મારે...

(1) અદાણી અને (2) અંબાણી

- તો સાચું કહેજો, સરકાર ટકે કે જાય ??

***

- મન્નુ શેખચલ્લી