અમુક વાતો એવી હોય છે કે માણસ વિચારતો જ રહી જાય પણ એનો ઉકેલ કદી જડતો નથી… છતાં એ વાત જાણ્યા પછી જરૂર બોલી જાય છે કે ‘એ હા… હોં !’ જેમકે…
***
ગામડામાં ગાયોને ઘરમાં બાંધીને રાખે છે અને કૂતરાંઓ ગામમાં છૂટા ફરતા હોય છે.
જ્યારે શહેરમાં કૂતરાંને ઘરમાં બાંધીને રાખે છે અને ગાયો રસ્તા પર છૂટી ફરતી હોય છે !
(એ હા… હોં !)
***
અગાઉના લગ્નોમાં જમવાવાળા બેસી રહેતા હતા અને પીરસવાવાળા ફરતા રહેતા હતા.
આજે જમવાવાળા આખા ગ્રાઉન્ડમાં ફરતા રહે છે અને પીરસવાવાળા ચૂપચાપ ઊભા હોય છે !
(એ હા… હોં !)
***
પહેલાં વડીલો લગ્ન ગોઠવી કાઢતા અને છોકરા-છોકરીઓ માત્ર હા પાડતા હતા.
આજે છોકરા-છોકરીઓ જાતે જ લગ્ન ગોઠવી કાઢે છે અને વડીલો માત્ર ‘હા’ પાડે છે !
(હવે બોલો… એ હા… હોં !?)
***
અગાઉ તડબૂચ મોટાં આવતાં હતાં ત્યારે ફ્રીજ નાનાં હતાં.
આજે ફ્રીજ મોટાં થઈ ગયાં છે ત્યારે તડબૂચ નાનાં નાનાં આવે છે. બોલો.
(એ હા… હોં !)
***
આજે સ્કુલમાં પહેલી બેન્ચ ઉપર બેસનારને બધા પ્રશ્નોના જવાબ આપતાં આવડે છે.
પણ આવતી કાલે બધા પ્રશ્નોનો સામનો કરી શકે એવા સૌ છેલ્લી બેન્ચ ઉપર બેસનારા જ નીકળશે !
(વિચારી જોજો…)
***
બાકી, અગાઉ જે માણસો સાઇકલ પર બેસીને કાર ચલાવવાનાં સપનાં જોતા હતા.
એ જ માણસો આજે કારમાં બેસીને જિમમાં સાઇકલ ચલાવવા જાય છે !
(એ હા… હોં !)
***
- મન્નુ શેખચલ્લી
Comments
Post a Comment