એક બાજુ ગરમીનો પારો 44 ડિગ્રીને ટચ થઈ રહ્યો છે અને બીજી બાજુ બેચલર ડિગ્રીવાળાં છોકરા-છોકરીઓ પરણીને મેરેજમાં માસ્ટર્સનો કોર્સ કરવા જઇ રહ્યા છે !
આમાં સૌની હાલત કેવી થાય છે ? જુઓ…
***
એક તો સખ્ખત ગરમીને કારણે સતત ઠંડા પાણીની બોટલો ગટગટાવતા રહીએ છીએ...
એટલે જ્યારે જમવાનો ટાઇમ થાય ત્યારે પેટ ઓલરેડી ભરેલું હોય છે !
***
વરરાજા એસી કારમાં શાંતિથી નાળિયેર પકડીને બેઠો હોય છે…
અને જાનૈયાઓ નાચ્યા વિના જ પરસેવે રેબઝેબ હોય છે !
***
પણ પછી એનું સાટું વળી જાય છે. કેમકે મંડપમાં જાનૈયાઓ પંખાની આસપાસ બેઠા હોય છે…
અને વરરાજા ગરમાગરમ યજ્ઞની વેદી પાસે બેઠો હોય છે !
***
નવાઈની વાત એ છે કે શિયાળાનાં લગ્નોમાં છોકરીઓ બેકલેસ અને સ્લીવલેસ બ્લાઉઝો પહેરે છે છતાં એમને ઠંડી નથી લાગતી…
… અને ઉનાળામાં એજ છોકરીઓ ચળકતી ગોલ્ડન-સિલ્વર એમ્બ્રોયડરીવાળાં બ્લાઉઝો અને પંદર પંદર કિલોનાં વજનદાર ચણિયા પહેરે છે છતાં એમને ગરમી નથી લાગતી ! બોલો.
***
તમે માર્ક કરજો, વડીલોના રૂમાલો પરસેવો લૂછી લૂછીને ભીનાં પોતાં જેવાં બની જાય છે….
પણ આન્ટીઓ સાડીના પાલવ વડે મોં ઉપર પંખો નાંખ્યા કરશે પણ પોતાનો રૂમાલ નહીં વાપરે !
***
કેટરિંગવાળા પણ બહુ હોંશિયાર હોય છે. એ લોકો ઠંડુ વેલકમ ડ્રીન્ક વારંવાર મંડપમાં ફેરવ્યા કરશે…
પણ આઈસ્ક્રીમનું કાઉન્ટર છેક ખૂણામાં એવી રીતે રાખશે કે જાણે અહીં ટ્રેઝર-હન્ટની ગેમ ચાલી રહી હોય !
***
બાકી, તમે નહીં માનો આજકાલનાં લગ્નોમાં કેરીના રસને ઠંડો રાખવા માટે જેટલો બરફ દિવસ દરમ્યાન વપરાય છે…
એનાથી ડબલ બરફ રાત્રે તો બેઠકના ગ્લાસોમાં પડી જતો હોય છે.
***
- મન્નુ શેખચલ્લી
Comments
Post a Comment