હમણાં થોડા દિવસ પહેલાં ‘આંતરરાષ્ટ્રિય પુરુષ દિવસ’ આવીને જતો પણ રહ્યો ! કોઈ ખાસ સમારંભો વિના, કોઈ જાતની હોહા વિના, કોઈ મોટી ડંફાશો વિના !
કેમ ? કારણ કે પુરુષો બાઘા દેખાવાનો ભલે ડોળ કરતા હોય પણ અંદરથી બહુ જ ચાલાક છે ! જુઓ કઈ રીતે ?
***
પુરુષો લાંબા લાંબા ભાષણો કરે છે, સાત સાત દિવસ ચાલે એવી કથાઓ કરે છે, હજારો વાર્તાઓ નાટકો લખે છે, સેંકડો ફિલ્મો બનાવે છે…
પણ કહે છે શું ?
‘અભિવ્યક્તિ’ તો નારીને જ આવડે છે !
***
યુધ્ધો લડવા માટે પુરુષે તીર-કામઠાં, ભાલા, તલવાર, તોપ, બંદૂકો, મશીનગન, તોપ, ટેન્કો, વિમાન, મિસાઇલ્સ, પરમાણુ બોમ્બ અને રોબોટ સુધ્ધાંની શોધ જાતે કરી નાંખી..
પણ કહે છે શું ?
‘ક્રિએટિવીટી’ તો નારીમાં જ છે !
***
પુરુષોએ પ્રેશરકૂકર, સ્ટવ, ગેસનો ચૂલો, માઈક્રોવેવ ઓવન, રેડી-મેઈડ મસાલા, ફ્રાઇંગ પેન, નોન-સ્ટિક પેન… એવી અનેક શોધો કરીને, એનો વેપાર કરી કરીને પૈસા તો પોતાના જ ખિસ્સામાં નાંખ્યા.. ઉપરથી આ સાધનો વડે નારીને તો રસોડામાં જ ગોંધાયેલી રાખી..
પણ કહે છે શું ?
‘નારી સ્વાતંત્ર્ય’ એ જ નવા જમાનાનું સુત્ર છે ! બોલો.
***
પુરુષો પોતે તો બે જાતનાં પેન્ટ-શર્ટ, બે જાતનાં ચંપલ-બૂટ અને બે જાતની હેર-સ્ટાઈલમાં આખી જંદગી કાઢી નાંખે છે.
પણ સ્ત્રીઓને સત્તર જાતની સાડીઓ, અઢાર જાતના ડ્રેસ, ઓગણીસ જાતનાં સૌંદર્ય પ્રસાધનો અને એકવીસ જાતની હેર-સ્ટાઈલો કરવા માટે જોઈએ એટલા રૂપિયા આપ્યા જ કરે છે…
છતાં કહે છે શું ?
‘કરકસર’ કરતાં તો નારીને જ આવડે !
***
- મન્નુ શેખચલ્લી
Comments
Post a Comment