સમાચારોમાં વઘાર !

સમાચાર

એશિયા કપમાં હોંગકોંગની ટીમ માત્ર 38 રનમાં ઓલઆઉટ થઈ ગઈ. જેમાં સૌથી વધારે સ્કોર તો એકસ્ટ્રાનો હતો… 10 રન !

વઘાર

હોંગકોંગના યુવા ક્રિકેટરો હવે ‘એકસ્ટ્રા’ ખેલાડી બનવાની ટ્રેનીંગ લેવા માગે છે !

***

 

સમાચાર

દાઉદ ઇબ્રાહિમ ઉપર UN દ્વારા ઓલરેડી 199 કરોડ રૂપિયાનું ઈનામ જાહેર થયેલું છે. હવે ભારતની NIA એ દાઉદ માટે 15 લાખનું ઇનામ જાહેર કર્યું છે.

વઘાર

એક મિનિટ, આમાં તો એવું લાગે છે કે જાણે UN દાઉદનું ‘સન્માન’ કરી રહ્યું છે અને NIA ‘અપમાન’ કરી રહ્યું છે !

*** 

સમાચાર

આ વરસે કોમર્સ કોલેજોમાં 10,000 સીટો અને એન્જિનિયરીંગ કોલેજોમાં 15,000થી વધુ સીટો ખાલી પડી છે.

વઘાર

સારી વાત છે. આંકડાઓ જોતાં લાગે છે કે નજીકના ભવિષ્યમાં ‘બેરોજગાર કોલેજોની’ સંખ્યા ઘટતી જશે !

*** 

સમાચાર

ઓગસ્ટ મહિનામાં 35 લાખ કારોનું વેચાણ થયું છે, જે આખા વરસનું હાઈએસ્ટ છે.

વઘાર

જોયું ? સરકાર રસ્તાઓમાં ભલે ગમે એટલા ખાડા પાડતી રહે…. પ્રજા તો જાતે જ ખાડામાં પડવા તૈયાર છે !

*** 

સમાચાર

રાજકોટમાં ઢોર પકડનારી ટીમ ઉપર 70 બાઈકસવારો ગોરીલા પધ્ધતિથી હુમલાઓ કરીને નાસી જાય છે.

વઘાર

અમારી અપીલ છે કે એ શૂરવીર યોદ્ધાઓને પોતાની સેવાઓ માટે કાશ્મીર અને ચીનની સરહદે મોકલી આપવા જેવા છે.

*** 

સમાચાર

નવા અટલ બ્રિજ ઉપર પાનમસાલાની પિચકારીઓ મારવાને કારણે હવે બ્રિજ ઉપર જવા માટે 30 રૂપિયાનો ચાર્જ લાગશે.

વઘાર

જાહેર જનતાએ પેલા ચાર પાંચ થૂંકણિયાનો આભાર માનવો જોઈએ ! કે હવે માત્ર બે જ વરસમાં બ્રિજના પૈસા જનતા ચૂકવી આપશે ! આને જ કહેવાય… ‘આત્મનિર્ભર’ ભારત !

***

- મન્નુ શેખચલ્લી