પેટ્રોલ અને ડિઝલ વચ્ચેની જે સેન્ચુરી મારવાની રેસ હતી એમાં અચાનક ગેસના બાટલાએ સામટી દસ સેન્ચુરી મારી દીધી છે !
જોકે વાત મજાકની નથી સિરિયસ છે. મધ્યમ વર્ગ અને ગરીબ વર્ગની આ કરુણ (અછાંદસ) ગઝલ છે…
***
મોંઘવારીના જમાનાનું
આ સો ટકા છે સચ…
ઘરેલુ ગેસનો બાટલો
એક હજારને ટચ !
***
શું પેટ્રોલ, શું ડિઝલ,
અરે, લીંબુ પણ પાછળ
બજારભાવની મેરેથોનમાં
બાટલો ગોલ્ડ વિનર !
બોલો ગૃહિણીઓ તમે
થેન્ક્યુ વેરી વેરી મચ !
ઘરેલુ ગેસનો બાટલો
એક હજારને ટચ !
***
જાવ બિયરને શરણે
કરો વ્હિસ્કીને સરન્ડર
પણ ભલભલાનો નશો ઉતારે
આ ગેસનો સિલિન્ડર !
હોશમાં આવતાં પહેલાં
તું બચી શકે તો બચ !
ઘરેલુ ગેસનો બાટલો
એક હજારને ટચ !
***
ઘાટ કરતાં ઘડામણ મોંઘું
રસોઈ કરતાં ઇંધણ મોંઘું
શાક કરતા વઘાર મોંઘો
ચા કરતાં કિટલી ગરમ !
છેતરી ગયો છે ચા વાળો
ભલે સપનામાં તું રાચ !
ઘરેલુ ગેસનો બાટલો
એક હજારને ટચ !
***
પગાર વધે નહીં
લોન ઘટે નહીં
ત્રણ સાંધો ત્યાં તેર તૂટે
બજેટ હાલક ડોલક
ચારે બાજુ ઉછળે મોજાં
તારી હોડી વચ્ચે વચ !
ઘરેલુ ગેસનો બાટલો
એક હજારને ટચ !
***
- મન્નુ શેખચલ્લી
Comments
Post a Comment