એક લીંબુ ગઝલ !

હોય છે એસેન્સ કે,

પછી લેમનની ફ્લેવર

બધાં લીંબુ-શરબતમાં

લીંબુ નથી હોતા !

***

ક્યારેક લીંબુના વેપારી

ક્યારેક ડુંગળીના સ્ટોકિસ્ટ

લેભાગુઓના પ્રોફાઈલ

કદી સાચા નથી હોતા !

***

ઉઠાવી ડુંગળીની જોક્સ

ચોંટાડે લીંબુની ઉપર

એવા ડઝનબંધ જોક્સ

ઓરીજીનલ નથી હોતા !

***

વધી છે મોંઘવારી ત્યાં

શ્રીલંકા, પાકિસ્તાનમાં ય

પણ ઇન્ડિયામાં અવિશ્વાસના

પ્રસ્તાવો નથી હોતા !

***

લાગી નજર લીંબુને

લીંબુના જ ભાવની

દરવાજે ટાંગેલા લીંબુ

અસરકારક નથી હોતાં !

***

સહુને રડાવનારી એ

ડુંગળી ખુદ રુવે છે આજ

ઠાઠ મોંઘવારીમાં કોઈનાં

કાયમ નથી હોતા !

***

પૂજે છે પીળી ચીજોને

કદી સોનું, કદી લીંબુ

ધોરણો અંધ દુનિયાનાં

કદી સરખાં નથી હોતાં !

***

બને હેડલાઈનો, વિડીયો

જોક્સ ને રીલ્સ હજ્જારો

અછત સર્જાયા વિના, અહીં

કોઈ ‘રસ’ નથી લેતા !

***

શીખ્યા છે પાઠ આજે તો

પેટ્રોલ, ડિઝલ ને ગેસ

મૂછે લટકતાં લીંબુ પણ

કદી સ્થિર નથી હોતા !

***

છતાં છે વાહ-વાહી, ને

ઘણી ખમ્મા, ઘણી ખમ્મા

રાજમાં ‘લીંબુ-ચમચા’ઓ

રમતથી દૂર નથી હોતા !

***

- મન્નુ શેખચલ્લી