કોરોનાનો ડર જતો રહ્યો છે છતાં ડરેલી સરકારે હજી લગ્નો ઉપરનાં નિયંત્રણો પાછા ખેંચ્યાં નથી, આમાં ને આમાં તમે માર્ક કરજો કે કેવું કેવું થાય છે…
***
તમે માર્ક કરજો કે…
વરઘોડાઓના કારણે આજકાલ ટ્રાફિક જામ થતા જ નથી ! કેમ કે વરઘોડામાં માંડ 50 જણા હોય છે એમાંથી 15 જણા તો ચારેબાજુ ડાફોળિયાં મારીને એ ધ્યાન રાખતા હોય છે કે ક્યાંકથી પોલીસ આવીને માસ્ક વગરના જાનેયાઓનો દંડ ના ઉઘરાવવા માંડે !
***
તમે માર્ક કરજો કે…
લગ્નના મંડપમાં એકાદ તો વડીલ એવા હશે જ, જે થોડી થોડી વારે મંડપમાં હાજર રહેલા લોકોની સંખ્યા ગણ્યા કરતા હશે !
***
તમે માર્ક કરજો કે…
બુફે જમણવારમાં ગણીને બરોબ્બર 100 જ ડીશો મુકવામાં આવે છે ! એ પછી જે લોકો વધારાની ડીશો ઉપાડે છે તેમની તરફ ‘શંકા’ની નજરે જોવામાં આવે છે !
***
તમે માર્ક કરજો કે…
જે માસાઓ અને ફૂવાઓ અગાઉ વટ કે સાથ ચાંલ્લા અને કન્યાદાનની રકમ અને ગિફ્ટમાં આવેલા મોંઘા દાગીનાના વહીવટો સંભાળતા હતા...
...એમને આજકાલ જરાય ઇમ્પોર્ટન્સ મળતું નથી ! એમાંથી અમુકે તો ‘સ્વૈચ્છિક નિવૃત્તિ’ લઈને મામૂલી જુનિયરોને કામ સોંપી દીધું છે !
***
તમે એ પણ માર્ક કરજો કે…
આજકાલ લગ્નો ‘સસ્તામાં’ પતી રહ્યાં છે એ જોઈને મધ્યમવર્ગવાળા પોતાનાં સંતાનોને જલ્દી જલ્દી પરણાવી દેવા માગે છે…
… અને એ જ કારણસર મોટી મોટી પાર્ટીઓ પોતાનાં સંતાનોનાં લગ્નો ‘પોસ્પોન’ કરી રહ્યા છે ! બોલો.
- બ્લોક બસ્ટર ફિલ્મની રિલીઝ જેવી જ વાત થઈ ને !
***
- મન્નુ શેખચલ્લી
Comments
Post a Comment