થાળીઓ વગાડી
તારા નામે ડંડા ખાધા
દીવા પ્રગટાવ્યા
તારાં છાજિયાં લીધાં
નફ્ફટ કોરોના, હવે તો જા !
***
દાઢીઓ વધારી
અમે વાળ ના કપાવ્યા
બાધાઓ લીધી
કંઈક નાળિયેર વધેર્યા
જડસૂ કોરોના, હવે તો જા !
***
ઘરમાં ભરાઈને
મહિનાઓ કાઢ્યા
કચરા-પોતાનાં અમે
'ક્લાસ' પણ ભર્યા
હલકટ કોરોના, હવે તો જા !
***
નાસ લીધા કેટલા
કાઢા-ઉકાળા પીધા
બાબા રામદેવનાં યે
પ્રિસ્ક્રીપ્શનો લીધાં
હઠીલા કોરોના, હવે તો જા !
***
બુકાની ચઢાવી
અમારાં મોઢાં સંતાડ્યાં
માસ્કના નામે જ
લાખોનાં ચલણ ફડાવ્યાં
લાલચૂ કોરોના, હવે તો જા !
***
ભણતર ભૂલાવ્યાં
મોબાઇલના રવાડે
ફી ભરાવી ધરખમ
ને ‘ફ્રી’માં પાસ કરાવ્યા !
ચોરટા કોરોના હવે તો જા !
***
નોકરીઓ છોડાવી
ઘરમાં હાંડલાં લડાવ્યાં
નેતાઓએ તારા નામે
અમને લડાવ્યા
શેતાન કોરોના, હવે તો જા !
***
તિજોરી ભરી હોસ્પિટલની
ખિસ્સાં ખાલી કર્યાં
વગર વીમા પોલીસીએ
યમરાજે તેડાં કીધાં
મે’ર મૂઆ કોરોના, હવે તો જા !
***
રૂપાણી યે ગયા
ને ટ્રમ્પ પણ ગયા
અફઘાનમાંથી અમેરિકાનાં
લશ્કર પણ ગયાં....
બેશરમ કોરોના, હવે તો જા !
નફ્ફટ કોરોના હવે તો જા !
***
- મન્નુ શેખચલ્લી
Comments
Post a Comment