અમારો મહેસાણાવાળો બકો કોરોના ઉપર સખ્ખત બગડ્યો છે ! એણે હવે એક કવિતા લખી નાંખી છે જેમાં તે કોરોનાને મણમણની જોખાવી રહ્યો છે ! લો, તમે પણ સાંભળો….
***
અલ્યા કોરોંનિંયા
તારો વચાર શું છ ?
વિદાય લેવી છ મોંનભેર
કે ડફણોં ખાતોં જવું છ ?
બોલ, કોરોંનિંયા બોલ
તારો વચાર શુ છ ?
***
મોંન ઇંનો જ જળવાય
જે ટાઇમશર વદાય થોંય
બાકી, ગાંગુલી જેવો ગાંગુલી
બે કોડીનો થઈ જોંય !
અ’વ લાખેંણોં થઈને વખણોંવું છ ?
કે કોડીના થઈને રઝળવું છ ?
બોલ, કોરોંનિયાં બોલ
તારો વચાર શુ છ ?
***
તું આયો તોંણે ધોની અ’તો
બીજી લ્હેરમોં તો કોહલી અ’તો
પણ અ’વ તું વાશી અકરમ છ
તારા જેવા ચાર ચાર ચકરમ છ
અવ ચીનના શચિન થૈને રે’વુ છ ?
કે ઘરમોં પપ્પુ થૈને રખડવું છ ?
બોલ કોરોંનિંયા બોલ
તારો વચાર શુ છ ?
***
ચાર દા’ડામોં તો તારી
પક્કડ છૂટી જોંય છ
બે ડોઝ મોં તો તારી
ધાક ઉતરી જોંય છ
અવ તારાથી છોકરોંય ડરતોં નહીં
આ તો દંડ છ, નકર
અમીં માશ્ક ય પે’રતોં નહીં
તેં વધારી મેલ્યા ’તા
‘રેંમડેશીવર’નોં ઘરાક
પણ આજે હાળા તું છ
એક ‘ડોલો’નો ઘરાક !
અવ ‘ડેલ્ટા’નો મોંભો મોંણવો છ ?
કે મામુલી વાયરશ થૈને મરવું છ ?
બોલ હાહરીના, બોલ
તારો વચાર શુ છ ?
***
- મન્નુ શેખચલ્લી
Comments
Post a Comment