મોબાઇલની દુનિયાએ આપણને એટલા બધા નવા શબ્દો આપ્યા છે કે હવે એનો ગુજરાતીમાં રૂઢિપ્રયોગોની જેમ ઉપયોગ થવા લાગ્યો છે ! જુઓ…
***
કોલર ટ્યૂન બદલાઈ ગઈ
નેતાઓ, અભિનેતાઓ, વારંવાર રંગ બદલતા માણસો અને ખાસ કરીને જુઠ્ઠા લોકો માટે કહેવાય છે કે ‘જુઓ ? એની કોલર ટ્યૂન ફરીથી બદલાઇ ગઈ !’
***
કવરેજની બહાર છે
પત્ની પતિના કહ્યામાં ન હોય તો કહેવામાં આવે છે કે ‘એની બૈરી હંમેશાં એના કવરેજની બહાર જ હોય છે !’
હંમેશા રખડતા ફરતા લેભાગુ માણસો, જે કદી હાથમાં ના આવતા હોય એને પણ આવું જ કહી શકાય. ‘સાલો, જ્યારે જુઓ ત્યારે કવરેજની બહાર જ હોય છે !’
***
પિક્ચર ચોંટી ગયું
કોઇ ચોંકાવનારી વાત સાંભળીને માણસનું મોં ખુલ્લું રહી જાય તો કહેવામાં આવે કે ‘જોયું ? એ સાંભળતાં જ એનું પિક્ચર ચોંટી ગયું !’
***
ફાઇલ ખુલતી નથી
જેને સત્તર વાર સમજાવ્યા છતાં સમજતો જ ના હોય એને કહેવું પડે છે કે ‘ભઈ, તારી ફાઇલ કેમ ખુલતી નથી ?’
***
અવાજ કપાય છે
પત્ની આગળ પતિની અને બોસ આગળ કર્મચારીની કોઈ વાત ચાલતી જ ના હોય તો કહેવાય કે ‘એનો તો હંમેશા અવાજ કપાય છે !’
***
સ્ક્રીન લોક છે
હંમેશા ચૂપ રહેતા, મીંઢા અને એકલપેટા માણસને માટે તમે કહી શકો કે, ‘એનું હંમેશાં સ્ક્રીન લોક જ હોય છે !’
***
પેટર્ન લોક છે
અમુક લોકો આમ જુઓ તો સાવ ચૂપ જ હોય પરંતુ જ્યાં કોઇ ખાસ ટોપિકની વાત છેડો, કે કોઈ ચોક્કસ વ્યક્તિની બૂરાઇ ચાલુ કરો કે તરત જ બોલવા લાગે છે ! આવા નમૂનાઓ માટે કહેવાય છે કે, ‘જોયું ? એનું પેટર્ન લોક કેવું ખુલી ગયું ?’
***
- મન્નુ શેખચલ્લી
Comments
Post a Comment