નવા વરસાદમાં નવા ખાડા પડવાથી જુના ખાડામાં ઉમેરો થયો છે. એમાં વળી મંત્રીજીએ સ્કીમ કાઢી છે કે ખાડાના ફોટા વોટ્સએપમાં મુકો ! આમાં ને આમાં નવી કહેવતો બની રહી છે…
***
જુની કહેવત
ખાડો ખોદે તે પડે
નવી કહેવત
ખાડો ખોદે તે ય કોન્ટ્રાક્ટર અને ખાડો પુરે તે ય કોન્ટ્રાક્ટર !
***
જુની કહેવત
ઝાઝી કીડી સાપને તાણે
નવી કહેવત
ઝાઝા ખાડા બજેટને તાણે !
***
જુની કહેવત
એક નુર આદમી, ને હજાર નુર કપડાં
નવી કહેવત
એક ખાડો કદરૂપો, ને હજાર ફોટા વોટ્સએપમાં !
***
જુની કહેવત
નાગાની પૂંઠે બાવળ ઊગ્યો, તો કહે છાંયડો થયો
નવી કહેવત
રોડની વચ્ચે ખાડો પડ્યો, તો કહે હું ફેમસ થયો !
***
જુની કહેવત
ધૂળ ઉપર લીંપણ
નવી કહેવત
ખાડા ઉપર વોટ્સએપ !
***
જુની કહેવત
દોડવું હતું ને ઢાળ મળ્યો
નવી કહેવત
વટ મારવો હતો ને વોટ્સએપ મળ્યું ! (મંત્રીજીને)
***
જુની કહેવત
રાઈના ભાવ રાતે ગયા
નવી કહેવત
ખાડાના ફોટા, છો ખાડામાં ગયા !
***
જુની કહેવત
નાચવું નહીં ને આંગણું વાંકુ
નવી કહેવત
ખાડા પુરવા નહીં, ને ‘ગુલાબ’નો વાંક !
***
જુની કહેવત
ચાર દિન કી ચાંદની, ફિર અંધેરી રાત
નવી કહેવત
બે દહાડા રોડાં-કપચી, પછી ફરીથી ‘ડિસ્કો-માર્ગ’ !
***
- મન્નુ શેખચલ્લી
Comments
Post a Comment