એક બાજુ ધોધમાર વરસાદ પડ્યો એમાં બધા રોડ જ ધોવાઈ ગયા છે. બીજી બાજુ જે રોડ બચ્યા છે એમાં ખાડે ખાડા પડ્યા છે. અને ત્રીજી બાજુ નવરાત્રિ આવી રહી છે !
આમાં આપણે કેવા ગરબાઓની પ્રેક્ટિસ કરવાની ? થોડા નમૂના વાંચીને ગાઈ જુઓ…
***
વાદલડી વરસી રે
સડક પર ખાડા પડ્યા !
સડક પર મ્હાલવું શું ?
સ્કુટર મારે ઠેકડા રે !
***
મારા રોડ કેરા ફોટા રે
વીરો મારો લેવા હાલ્યો...
વીરા લઈને વ્હેલો સેન્ડ કરજે
મંત્રીજી એના બંગલે બેઠા !
***
શેરી વળાવી ને
ખાડા બતાવું, ઘેર આવો ને !
તમને ખાડે છબછબિયાં કરાવું
મંત્રીજી, ઘેર આવો ને !
***
ઘોર અંધારી રે રાતલડીમાં
લપસ્યાં સ્કુટી ચાર !
***
ઢીંકલાંગ ઢીંકલાંગ
વાગે છે ઢીંક માર
કમરના મણકા તૂટે બાર !
કે ખાડાએ માર્યા
ઢોર મારે… ! ઢોર મારે…!
ઢોર મારે... વારંવાર !
***
(‘હેલ્લારો’ના ગરબાની ધૂનમાં)
ઠેક્યાં મેં ખાડા ને
ઠેકી મેં પાળ,
ઠેક્યાં ખાબોચિયાં ને
ઠેકી છે નાળ,
ઠેકી ગટર ને
મેં ઠેક્યા ભૂવા,
ઠેક્યાં ફૂટપાથનાં
સૌએ દબાણ !
ઠેકી ઠેકીને હવે
થાકી છું છેક…
ત્યારે કહે છે હવે
ફોટાઓ મુક !!
હે જી રે તારા
વોટ્સએપમાં ફોટા મુક !!
***
(મહેંદી રંગ લાગ્યો રે)
ખાડા પડ્યા મારા ગામમાં,
ને એના ફોટા ગયા પરદેશ રે...
વોટ્સએપની સ્કીમો આવી !
ફોટા મુકીને વીરા
શું રે કરું… ?
એના પુરનારા છે બદમાશ !
વિકાસની સ્કીમો આવી !!
***
- મન્નુ શેખચલ્લી
Comments
Post a Comment