સ્કૂલનાં છોકરાંઓની માંગણીઓ !

ઓનલાઈન દોઢ વરસ ભણ્યા પછી હવે સ્કુલનાં છોકરાંઓને જાતે નિશાળમાં જઈને ભણવાનું ફાવતું નથી ! કહે છે કે આ ઓફલાઇન શિક્ષણમાં અમુક પાયાના ફેરફારો કરવા માટે સ્કુલનાં છોકરાંઓ નવી નવી માગણીઓ કરવાના છે ! જુઓ…

***

માગણી નંબર (1)

સ્કુલમાં અને ક્લાસમાં મોબાઇલ એલાઉડ હોવો જોઈએ.

***

માગણી નંબર (2)

ચાલુ ક્લાસે મોબાઈલ ચાલુ રાખવાનું પણ એલાઉડ હોવું જોઈએ.

***

માગણી નંબર (3)

ધોરણ 1 થી 5માં જોડે મમ્મીઓને બેસાડવાનું એલાઉડ કરવું પડશે. નહિતર અમને ‘ભણાવશે’ કોણ ?

***

માગણી નંબર (4)

ચાલુ ક્લાસે, મોબાઈલ ચાલુ રાખીને મુવી કે ગાયન જોતાં જોતાં અથવા ગેમ રમતાં રમતાં ઘરેથી લાવેલો નાસ્તો ખાવાનું એલાઉડ હોવું જોઈએ.

***

માગણી નંબર (5)

આ બધું એલાઉડ હોવું જોઈએ પણ ટિચર કે સર ‘લાઉડ’ અવાજે ભણાવે… તે એલાઉડ ના હોવું જોઈએ. મોબાઈલમાં ડિસ્ટર્બ થાય છે.

***

માગણી નંબર (6)

ક્લાસમાં ઓફલાઇન ભણતા હોઈએ તો પણ મોબાઈલમાં ઓનલાઈન ક્લાસ ચાલુ કરીને ક્લાસની બહાર રખડવા જવાનું એલાઉડ હોવું જોઈએ.

***

માગણી નંબર (7)

ક્લાસમાં બેસાડીને પેન વડે નોટમાં લખાવે છે તે બંધ કરીને બધું મોબાઈલમાં કોપી-પેસ્ટ કરવાનું એલાઉડ કરો.

***

માગણી નંબર (8)

ભણાવવું હોય તો ભણાવો, ને ના ભણાવવું હોય તો ના ભણાવો પણ આ વરસે બી બધાને પાસ કરી દેવાનું પ્રોમિસ આપો !

***

- મન્નુ શેખચલ્લી