અમુક લોકોની બોલવાની ખાસિયતો પહેલી નજરે બહુ સામાન્ય લાગતી હોય છે પણ તમે જરા ધ્યાનથી વિચારશો તો જ ખ્યાલ આવશે ! જેમકે…
***
તમે ખાસ જોજો કે…
જે લોકો એમ કહેતા હોય કે ‘પછી ક્યારેક મળીએ શાંતિથી…’
- એ લોકો હંમેશા ઉતાવળમાં જ હોય છે !
***
તમે ખાસ જોજો કે…
‘કંઈ કામ હોય તો અડધી રાતે ફોન કરજો !’ એવું કહેનારાઓને…
- તમે ભરબપોરે દસ ફોન કરો તોય ઉપાડતા નથી !
***
તમે ખાસ જોજો કે…
‘તમારે રિક્વેસ્ટ ના કરવાની હોય, તમારે તો બસ હુકમ કરવાનો !’
- આવું કહેનારાને તમે ખરેખર હુકમ કરો તો એમને ખોટું લાગી જાય છે !
***
તમે ખાસ જોજો કે…
‘યાર, તમે તો કદી દેખાતા જ નથી !’
- આવું કહેનારા તમારી સામે જ ઊભા હોવા છતાં કદી પોતાના ચશ્માનો નંબર ચેક કરાવતા નથી !
***
તમે ખાસ જોજો કે…
‘તને તો જોઈ લઈશ !’
- આવું કહેનારા પણ કદી પોતાના નંબર ચેક કરાવતા નથી !
***
તમે ખાસ જોજો કે…
જે લોકો એવું કહેતા હોય કે ‘કોઈક દિવસ અમારા ઘરે આવો…’
- એ લોકો ઘણીવાર પોતાના ઘરની બહાર ઊભા રહીને જ આવું કહેતા હોય છે !
***
તમે ખાસ જોજો કે…
‘બે મિનિટ વાત થશે ને ?’
- આવું કહીને ફોન કરનારાઓ મિનિમમ પંદર મિનિટ સુધી ફોનમાં લપ કરતા હોય છે !
***
તમે ખાસ જોજો કે…
જે લોકો વારંવાર ‘ખાસ કરીને… ખાસ કરીને…’ એવું બોલ્યા કરતાં હોય છે…
- એમની પાસે ‘ખાસ’ કંઈ કહેવા જેવું હોતું જ નથી ! અમારી માફક.
***
- મન્નુ શેખચલ્લી
Comments
Post a Comment