તમે માર્ક કરજો, જ્યારે બે-ત્રણ ફેમિલી ભેગાં થઈને રેસ્ટોરન્ટમાં જમવા માટે જાય છે ત્યારે એમનો એક ચોક્કસ ‘સ્ટાન્ડર્ડ પ્રોસિજર’ હોય છે…!
***
- રેસ્ટોરન્ટમાં ભીડ હોય એટલે નામ નોંધાવીને બધા બહાર મુંગામુંગા બેસી રહે છે.
- વડીલો બેસણામાં આવ્યા હોય એ રીતે, અને યંગસ્ટરો જાણે ઓનલાઇન ક્લાસ ચાલતા હોય એ રીતે મોબાઈલમાં બિઝી હોય છે.
- બે જણા વારાફરતી પોતાનું નોંધાવેલું નામ આવ્યું કે નહીં તેની તપાસ કરતા રહે છે. બાકીના ‘બેસણા-પ્રોસિજર’નું પાલન ચાલુ રાખે છે.
- પોતાનો નંબર આવે ત્યારે અંદર જઈને બેસવાની ઉતાવળ આવી જાય છે.
- બેસી ગયા પછી કશી ઉતાવળ હોતી નથી.
- મેનુ આવે ત્યારે જાણે અઘરી પરીક્ષાનું પેપર હોય એ રીતે તેનો અભ્યાસ થાય છે.
- પછી અંદરો અંદર શું મંગાવવું તેનું ભારે ડિસ્કશન થાય છે.
- વેઇટરને બોલાવીને પૂછવામાં આવે છે કે કઈ વાનગીમાં શું હોય છે. (ક્યારેક તો વાનગીનો ઉચ્ચાર ચાર વાર કરાવે છે.)
- ઓર્ડર અપાઈ ગયા પછી બધા પોતપોતાના મોબાઈલોમાં બિઝી થઈ જાય છે.
- શરૂઆતમાં મસાલા પાપડ કે સ્ટાર્ટર આવે ત્યારે ધીમે ધીમે ખાતા જતાં વાતો શરૂ થાય છે.
- જમવાનું આવે ત્યારે જમતાં પહેલાં બધા સ્માઈલો આપીને સેલ્ફીઓ લે છે.
- પછી બધા જમવામાં બિઝી થઈ જાય છે.
- એમાં અમુક લોકો બીજાને એવી રીતે આગ્રહ કરીને ખવડાવે છે કે જાણે પોતાના ઘરમાં આવેલા મહેમાન હોય.
- જમતાં જમતાં બધાની જીભ ખૂલી જાય છે. બધા મોટા અવાજે વાતો કરવા માંડે છે.
- વાતોમાં બહેનો વિવિધ વાનગીઓ ડિસ્કસ કરે છે અને ભાઈઓ શેરબજાર, ક્રિકેટ અને પોલિટીક્સનું ડિસ્કશન કરે છે.
- જમવાનું પતે પછી બિલ આવે ત્યારે બે ત્રણ જણા વચ્ચે ખેંચવાનો રીવાજ ચાલે છે.
- બિલ ચૂકવતાં પહેલાં એક જણ ધ્યાનથી તમામ વિગતો ચેક કરે છે.
- બહાર નીકળતાં સૌ વાર લગાડે છે. આ વખતે જ રેસ્ટોરન્ટનું ઇન્ટિરીયર ડેકોરેશન ધ્યાનથી જુએ છે.
- પછી સૌ ખુબ બધી ગ્રુપ સેલ્ફીઓ લે છે.
- છેવટે ફુગ્ગાવાળા છોકરાને પાંચ રૂપિયા આપીને છૂટા પડે છે !
મન્નુ શેખચલ્લી
Comments
Post a Comment