સરકારે બેન્ડવાજાં અને ડીજે સાથે જાહેરમાં 400 જણા સાથે વરઘોડો કાઢવાની છૂટ તો આપી છે…
… પણ લગ્નમાં માત્ર 50 જાનૈયાને જ લઈ જવાની છૂટ છે ! તો બાકીના 350 જાનૈયા લગનનું જમશે ક્યાં ? રોડ ઉપર ?
ના ના, આ તો એક વાત છે !
***
બધા મિડિયામાં સમાચાર આવી ગયા કે અક્ષય કુમારની મમ્મીનું નિધન થયું…
… પણ કોઈ એમ કેમ નથી કહેતું કે બિચારી ટ્વીંકલ ખન્નાની સાસુ મરી ગઈ !
ના ના, આ તો એક વાત છે !
***
કહે છે કે અફઘાનિસ્તાનની કોલેજોમાં ભણતા છોકરાઓ અને છોકરીઓ વચ્ચે ક્લાસમાં પરદો રાખવામાં આવશે !
આખી પ્રથાનો આખરે હેતુ શું છે ? છોકરાઓએ ક્લાસમાં જ હાજરી પુરાવવાની કે ક્લાસની બહાર રાહ જોતા બેસી રહેવાનું ?
ના ના, આ તો એક વાત થાય છે !
***
સંવત્સરીના દિવસે સૌ એકબીજાને ‘મિચ્છામિ દુક્કડમ’ કહીને માફી તો માગે છે…
… પણ તપાસ એ કરવા જેવી છે કે માફી ‘આપે છે’ કેટલા ?
ના ના, આ તો એક વાત છે !
***
તાલિબાનના નવા શિક્ષણમંત્રી કહે છે કે ‘ડીગ્રીની કંઈ વેલ્યુ જ નથી. જુઓ, તાલિબાન સરકારના મંત્રીઓ ડિગ્રી લીધા વિના પણ કેટલા મહાન છે !’
સાચી વાત છે, ભારતના ડિગ્રી વગરના મંત્રીઓ તો વરસોથી આમ કહેતા આવ્યા છે ! પણ એમનું સાંભળે છે કોણ ?
ના ના, આ તો એક વાત છે !
***
સરકારી કર્મચારીઓનું મોંઘવારી ભથ્થું 18 ટકાથી વધીને સીધું 25 ટકા થઈ ગયું !
તો હવે બિન-સરકારી કર્મચારીઓએ મોંઘવારીને પહોંચી વળવા માટે શું કરવાનું ? ભજન ?
ના ના, આ તો એક વાત છે…
***
અને બંગાળના મહિલા સાંસદ કહે છે કે મારા બાબાના પપ્પાને ખબર છે કે બાબાના પપ્પા કોણ છે !
- એક મિનિટ, આ વળી કેવી વાત છે ?
***
- મન્નુ શેખચલ્લી
Comments
Post a Comment