દેશમાં ભલે લોકશાહી હોય, ભલે સમાનતાની વાતો થતી હોય, પણ નાના માણસ અને મોટા માણસ માટે વપરાતા શબ્દોમાં જ ફરક સમજાઈ જાય છે. જુઓ…
***
નાનો માણસ દેવું કરે તો ‘દેવાળિયો’…
અને મોટો માણસ દેવું કરે તો ‘ડિફોલ્ટર’ !
***
નાનો માણસ ધંધો ચાલુ કરે તો ‘ગલ્લાવાળો’…
અને મોટો માણસ બિઝનેસ ચાલુ કરે તો ‘એન્ટરપ્રોન્યોર’ !
***
નાના માણસો ટીકા કરે તો ‘પંચાતિયા’…
અને મોટા માણસો કોમેન્ટ કરે તો ‘ઓપિનિયન’ !
***
નાના માણસો ઉપવાસ કરે તો ‘ધાર્મિક અંધશ્રદ્ધા’…
અને મોટા માણસો ભૂખ્યા રહે તો ‘ડાયેટ કંટ્રોલ’ !
***
નાનો માણસ સલાહ આપે તો ‘દોઢ ડાહ્યો’…
અને મોટી સેલિબ્રિટી એકાદ બ્રાન્ડનું નામ પણ બોલે તો ‘ઇન્ફ્લુએન્સર’!
***
નાનો માણસ આચર-કુચર ખાય તો ‘ખાઉધરો’…
અને મોટો માણસ જાતજાતનું ખાધા કરે તો ‘ફૂડીઈઈ’!
***
નાનો માણસ પત્ની ઘરમાં મદદ કરે તો ‘બૈરીનો ગુલામ’…
અને મોટો માણસ વાઈફને કિચનમાં હેલ્પ કરે તો ‘જેન્ડર ઇક્વાલિટી’ !
***
નાનો માણસ ખાસ વાતો ના કરે તો ‘મુંજી’…
મોટો માણસ કોઈ સાથે ના ભળે તો ‘ફુલ ટાઈપ’ !
***
નાના માણસો વરઘોડામાં નાચે તો ‘સડકછાપ’…
અને મોટા માણસો ગમે ત્યારે જાહેર જગ્યામાં અચાનક નાચવા માંડે તો ‘ફ્લેશ-મોબ’ !
***
નાના માણસો મંદિરના ઓટલે માઇક ગોઠવીને ભજન કરે તો ‘ઘોંઘાટ’…
અને મોટા માણસો કાન ફાડી નાંખે એવા સ્પીકરો ગોઠવીને મોટા મેદાનમાં ફેમસ સિંગર પાસે રાગડા તણાવે તો એ ‘મ્યુઝિક કોન્સર્ટ’ !
***
અને હા, નાનો માણસ માસ્ક વિના ફરે તો 1000 રૂપિયા દંડ…
પણ મોટો માણસ માસ્ક વિના સભાઓ ભરે તો ‘પાર્ટી લીડર’ !
***
- મન્નુ શેખચલ્લી
Comments
Post a Comment