દરેક પ્રદેશની કહેવતોમાં ત્યાંનું ડહાપણ છૂપાયેલું હોય છે. અફઘાનિસ્તાનની જુની કહેવતોમાં પણ એ જ જોવા મળે છે ! બસ, જરા નજર બદલવાની જરૂર છે ! જુઓ….
***
જુની કહેવત :
બહેરો બે વાર હસે
નવી કહેવત :
અમેરિકન બે વાર મુરખ બને.
***
જુની કહેવત :
ઊંટ મોટું રાખો તો ઘરનો દરવાજો પણ મોટો રાખો.
નવી કહેવત :
સૈન્ય મોટું રાખો તો મેદાન છોડીને ભાગવાનો રસ્તો પણ પહોળો રાખો.
***
જુની કહેવત :
ગળતા છાપરામાંથી નીકળીને વરસતા વરસાદમાં બેસવું.
નવી કહેવત :
વિયેતનામમાંથી નીકળીને અફઘાનિસ્તાનમાં ઘૂસવું.
***
જુની કહેવત :
કરચલો લંગડો થશે ત્યારે જ સીધો ચાલશે.
નવી કહેવત :
અમેરિકન ઉલ્લુ બનશે ત્યારે જ અક્કલ આવશે.
***
જુની કહેવત :
લાકડું બળી જાય છે પણ એનો ધૂમાડો આંખોમાં ખૂંચતો રહે છે.
નવી કહેવત :
સૈન્ય જતું રહે છે પણ એનાં શસ્ત્રો નડતાં રહે છે.
***
જુની કહેવત :
એક હાથ વડે બે તડબૂચ ના પકડાય.
નવી કહેવત :
શાંતિ અને તાલિબાન બંને સાથે ના રખાય.
***
જુની કહેવત :
ગધેડા ઉપર બેઠો છે અને કહે છે કે ગધેડો ખોવાઈ ગયો છે.
નવી કહેવત :
તાલિબાનોને સાથ આપે છે અને કહે છે કે તાલિબાનો વિલન છે.
***
જુની કહેવત :
મફતમાં મળતાં ખજૂર મધ કરતાં ય મીઠાં લાગે.
નવી કહેવત :
મફતમાં મળતી મશીનગન રોકેટ લોંચર કરતાં ય જબરી લાગે.
***
જુની કહેવત :
મારી ડફલી જુઠું બોલે છે, હું નહીં.
નવી કહેવત :
મારું સેક્યુલારિઝમ જુઠું બોલે છે, હું નહીં !
***
- મન્નુ શેખચલ્લી
Comments
Post a Comment