વિચાર કરો, હજી દસ-પંદર વરસ પહેલાં જ આપણે જુના, બ્લેક એન્ડ વ્હાઈટ, નાનકડા નોકિયા ટાઇપના ‘ડોબા’ ફોન વાપરતા હતા ! હવે બધા ‘સ્માર્ટ’ થઈ ગયા છે ! (માણસો પણ.)
***
ડોબા ફોન
એટલા નાનકડા આવતા હતા કે હથેળીમાં સંતાડી શકાતા હતા.
સ્માર્ટ ફોન
એટલા મોટા આવતા થયા છે કે ખોબામાં પણ સમાતા નથી !
***
ડોબા ફોન
એમાં ગેમના નામે પેલું સાપોલિયું જ આવતું હતું.
સ્માર્ટ ફોન
આમાં ગેમ રમતાં રમતાં જુવાનિયાઓ કલાકો લગી પથારીમાં સાપોલિયાંની માફક આળોટતા રહે છે !
***
ડોબા ફોન
100 અક્ષરનો મેસેજ ટાઈપ કરતાં કરતાં તો અંગૂઠા દુઃખી જતા હતા.
સ્માર્ટ ફોન
100 અક્ષરનું એક ટ્વીટર ક્યારેક આખા દેશનો માથાનો દુઃખાવો બની જાય છે !
***
ડોબા ફોન
લેન્ડ-લાઇન ફોનથી મુક્તિ મળી એટલે માણસ હરતો ફરતો થઈ ગયો.
સ્માર્ટ ફોન
હરતા ફરતા માણસો પણ કલાકો લગી સ્માર્ટ ફોનમાં ચોંટી રહે છે !
***
ડોબા ફોન
સારા મોડલમાં પણ ફોટા તો આધાર-કાર્ડ જેવા જ પડતા હતા.
સ્માર્ટ ફોન
આન્ટી પોતે છેક 1955નું મોડલ હોય છતાં સેલ્ફીમાં તો 2021નું મોડેલિંગ કરતા હોય એવા ફોટા પડે છે !
***
ડોબા ફોન
પંદર વરસ પછી પણ નવો જ હોય તેમ ચાલે છે.
સ્માર્ટ ફોન
બે વરસમાં તો ‘જુનો’ થઇ જાય છે !
***
- મન્નુ શેખચલ્લી
Comments
Post a Comment