આ કોરોનાકાળમાં બધું બદલાઇ ગયું છે. ફિલ્મો મોબાઈલમાં જોવી પડે છે, ઓફિસ ઘરમાં જ હોય છે અને દસમું તો ભણ્યા વિના પાસ થઇ જવાય છે !
આવા સમયમાં જુના જમાનાના ગુજરાતી દૂહા પણ બદલાઇ ગયા છે ! સાંભળો…
***
શિયાળે શરદી ભલી
ઉનાળે ફ્લુ-તાવ
ચોમાસે મરડો ભલો
કોરોના બારે માસ !
***
વા ફરે, વાદળ ફરે
ફરે નદીનાં પૂર
સરકાર બોલીને ના ફરે
એવું બને નહીં, ચતૂર !
***
ગુજરાતમાં કોક દિ’
ભૂલો પડે ભગવાન
મ્યુકોમાક્રોસિસ થયા વિના
ઓક્સિજન સુંઘાડું શામળા !
***
આંકડા ગણ તો, ભક્ત(ના) ગણ
કાં સાજા, કાં વેક્સિનના
નહિતર કહેજે ‘નો કોમેન્ટ્સ’
મત ઊઘાડીશ જૂઠ !
***
અગ્નિ બાળે અન્નને
ઇર્ષ્યા બાળે સંબંધ
સત્તા બાળે સન્મતિ
પણ કોરોના બાળે ઘમંડ !
***
દેનારાને જશ નહીં
લ્યે તેનું નુકસાન
કોરોના એવો ચેપ, જ્યાં
બન્ને પાર્ટી બદનામ !
***
વ્હાલા લાગે વિરોધીને
જો સ્મશાનના ભડકા
તે દિ’ સાચુ જાણવું
કળિયુગના આ થડકા !
***
માનવમાં દેખાય જો
દાનવના દિદાર
પાડ માન કોરોનાનો
ઊઘાડી તારી આંખ !
***
ચાલુ ગાડીએ સૌ ચડે
પડ્યો એ લાતો ખાય
વોટ્સએપની આ ગંગામાં
બાબા રામદેવ પણ ન્હાય !
***
- મન્નુ શેખચલ્લી
Comments
Post a Comment