કોરોનાની બીજી લહેરે ગાભા કાઢી નાંખ્યા છે ! પ્રજા તો શું, સરકાર પણ શું, ખુદ વૈજ્ઞાનિકોને ખબર નહોતી કે આવો હાહાકાર મચી જશે !
વળી, આમાં RTI (રાઇટ ટુ ઇન્ફરમેશન)ની ફરિયાદ પણ કોને કરવી ? કારણ કે…
***
નહોતી ખબર કે
પહેલી પછી, બીજી લહેર હશે
અને બીજી લહેરનો આવો
ગજબ કહેર હશે…
***
લાઇનો લગાવી ઊભા
છેક નોટબંધીથી…
નહોતી ખબર કે એ પણ
સ્મશાનો સુધી હશે...
***
(અરે ? Why so serious? જરા હળવા થાઓ ! કેમકે…)
એમ્બ્યુલન્સની લાઈન..
ઇન્જેક્શનની લાઈન..
નહોતી ખબર કે લાઈનો
ફરી દારૂની પણ હશે !
***
(બંગાળની ચૂંટણી રેલીઓમાં હવે 500 જણાની લિમિટ છે ! બોલો.)
50-50ની લિમિટમાં
અહીં લગ્નો પતાવ્યાં
નહોતી ખબર ત્યાં રેલીમાં
500ની લિમિટ હશે !
***
કોર્ટ ઠપકારે સરકારને
સરકાર કહે પ્રજાનો દોષ
નહોતી ખબર કે આખી
રમત ‘ખો-ખો’ની હશે !
***
(માસ્ક વિના ફરીને પ્રજાએ કુલ 110 કરોડનો દંડ ભર્યો છે પણ સિરિયસલી, આજે એ રૂપિયામાંથી પ્રજાને શું સગવડ મળે છે ?)
હજાર હજાર ભરીને
કરોડોના દંડ ભર્યા
નહોતી ખબર કે કિંમત
અમારી કોડીની હશે !
***
(વેક્સિન લીધા પછી પણ કોઈ કોઇને કોરોના થાય છે. આમાં શું સમજવું ?)
હોંશે હોંશે કોવિડની
વેક્સિન પણ લીધી
નહોતી ખબર કે કોવિડનો
નવો ‘વેરિયન્ટ’ હશે !
***
ચીની હશે, બ્રિટીશ હશે,
બ્રાઝિલિયન હશે…
નહોતી ખબર કે વેરિયન્ટ
સાલો ‘ઇન્ડિયન’ જ હશે !
***
- મન્નુ શેખચલ્લી
Comments
Post a Comment