પેટ્રોલ – ડિઝલના ભાવ હોય, કોરોનાના કેસ હોય કે નેતાઓનાં નિવેદનો હોય. લાગે છે કે હવે જનતાને ખાસ કોઈ ફેર પડતો જ નથી ! બધું કોઠે પડી રહ્યું છે…
***
વધે છે, વધે છે, વધે છે
ક્યારેક વળી ઘટે છે
પેટ્રોલ-ડિઝલના ભાવ
કોઠે પડી ગયા છે !
***
ઘટે છે, ઘટે છે, ઘટે છે
અચાનક ફરી વધે છે
કોરોનાના કેસ પણ
કોઠે પડી ગયા છે !
***
લડે છે, લડે છે, લડે છે
રોજેરોજ બહુ લડે છે
નેતાઓના એ શબ્દો
કોઠે પડી ગયા છે !
***
ફૂટે છે, ફૂટે છે, ફૂટે છે
રોજ કોઈ ભાંડો ફૂટે છે
બ્રેકિંગ ન્યુઝ પણ આ
કોઠે પડી ગયા છે !
***
ભાંડે છે, ભાંડે છે, ભાંડે છે
એકબીજાને ટોણાથી
ટ્વીટરમાં ફિલ્મ-સ્ટારો
કોઠે પડી ગયા છે !
***
હસે છે, હસે છે, હસે છે
હાહા હીહી હસે છે
કપિલના શોમાં અર્ચના
કોઠે પડી ગયાં છે !
***
વાગે છે, વાગે છે, વાગે છે
હવે ચારેકોર વાગે છે
વિકાસનાં આ ગાણાં
કોઠે પડી ગયાં છે !
***
જાગે છે, જાગે છે, જાગે છે
કોંગ્રેસીઓ હવે જાગે છે
એવાં ઠગારાં ગપ્પાં
કોઠે પડી ગયાં છે !
***
આવે છે, જાય છે, આવે છે…
સુખ અને દુઃખના દહાડા
સપનાંઓ લાગે ‘ચાઇનિઝ’
કોઠે પડી ગયાં છે !
***
- મન્નુ શેખચલ્લી
Comments
Post a Comment