ફરી નાઇટ કરફ્યુ આવી ગયો, ફરી કેસ વધી ગયા, ફરી ડર ફેલાવા લાગ્યો, ફરી ડંડા ફરી વળ્યા…
યાર, માંડ માંડ કોરોનાને બર્થ-ડે ગિફ્ટ આપીને સમજાવી પટાવીને પાછો મોકલતા હતા ત્યાં તો ફરી આપણી પથારી ફરી ગઈ !
***
દંડ ભર્યા, ડંડા ખાધા
માસ્ક પહેરીને
માંડ બચ્યા, ત્યાં
ફરી હતા ત્યાં ને ત્યાં !
***
ઘરની તાજી રોટલી છોડી
રેસ્ટોરન્ટની વાસી પોચી
સેન્ડવીચ માંડ ખાધી ત્યાં
ફરી હતા ત્યાં ને ત્યાં … !
***
બર્મૂડા છોડી, પેન્ટ પહેર્યાં
વાઇફથી છૂટી, બોસના શરણે
માંડ હજી ગયા’તા, ત્યાં
ફરી હતા ત્યાં ને ત્યાં… !
***
ફાંદ વધેલી હરી ભરી
વિના ડાયેટિંગ, વિના કસરતે
માંડ થોડી ઘટાડી, ત્યાં
ફરી હતા ત્યાં ને ત્યાં…!
***
અડધી ચા, ફૂટપાથની કિટલી
પાણીપુરી ને તીખી દાબેલી
મોજ સડકની માંડ માણી, ત્યાં
ફરી હતા ત્યાં ને ત્યાં…!
***
ઓનલાઇન ભણતર
ઑફ કરીને
કોલેજનો વિરહ
ડ્રોપ કરીને
માંડ કેન્ટિનમાં મહેફિલ માંડી
પણ હતા ત્યાં ને ત્યાં !
***
મોલમાં જઈને લટાર મારતા
ગાર્ડનમાં બે ગપાટા,
હાઈવે ઉપર લોંગ-ડ્રાઈવ
સોસાયટીમાં બે આંટા
બાંધેલા પગ માંડ છૂટ્યા, ત્યાં
ફરી હતા ત્યાં ને ત્યાં…!
***
વોટ આપીને હરખાયા
કે લોકશાહીને ટકાવી
લારી ગલ્લા પાથરણાંએ
આઝાદી માંડ ચાખી, ત્યાં
ફરી હતા ત્યાં ને ત્યાં…!
***
વાંક કોનો ને દંડ કોને
એવા સવાલ નકામા
રાજા કરે એ રંગરેલી
ને પ્રજા કરે એ ભવાઈ !
ફરી હતા ત્યાં ને ત્યાં…
***
- મન્નુ શેખચલ્લી
Comments
Post a Comment