જ્યારથી સ્ટેડિયમનું નામ સાહેબના નામ પરથી રાખ્યું છે ત્યારથી બસ, વિવાદ જ ચાલ્યો છે ! હવે તમે જ કહો, જેમાં ને તેમાં વાંક સઘળો નામનો જ હોય ?
***
બે દિવસમાં સૂપડાં સાફ
ત્રણ દિ’ની ડિપોઝિટ ડૂલ
એમાં ય શું,
વાંક સઘળો નામનો છે ?
***
‘રાહુલ’ સાવ ઝિરોમાં જાય
પિચ ઉપર પણ ના ટકે
એમાં ય શું,
વાંક સઘળો નામનો છે ?
***
વિદેશીઓનાં દાંડીયા ડૂલ
ભારતનો જયજયકાર…
એમાં ય શું
વાંક સઘળો નામનો છે ?
***
ટ્રમ્પ જેવો ટ્રમ્પ પણ
અહીં આવ્યા પછી હારી જાય
એમાં ય શું,
વાંક સઘળો નામનો છે ?
***
પાણીના ય પેટ્રોલની જેમ
ડબલ ભાવ હોંશે અપાય
એમાંય વળી,
વાંક સઘળો નામનો છે ?
***
એક છેડો અદાણીનો
બીજો છેડો રિલાયન્સનો
બન્નેના ‘છેડા અડે છે’…
એમાંય યાર,
વાંક સઘળો નામનો છે ?
***
જ્યાં એમનું નામ પડે
ત્યાં ભીડ ભેગી થાય જ છે !
એમાંય ભઈ,
વાંક સઘળો નામનો છે ?
***
યાર, ભીડ થઈ ગઈ મેચમાં
ને કોરોના આખા રાજ્યમાં,
છતાં ય સાહેબો,
વાંક સઘળો નામનો છે ?
***
- મન્નુ શેખચલ્લી
Comments
Post a Comment