ગઈકાલે ‘સૈફ’ પાલનપુરીની ક્ષમા સાથે એમની મશહુર શાયરીઓ વડે થોડી ‘પેટ્રોલ-પેરોડી’ કરી હતી. તો આજે એ જ ખયાલી મુશાયરામાં ‘મરીઝ’ સાહેબનો આત્મા પધાર્યો છે !
સાંભળો ‘મરીઝ’નું દર્દ શું છે… (દવા તો કોઈ પાસે નથી.)
***
જિંદગીની કારના ડ્રાઈવીંગમાં
જલ્દી ના કરો ‘મરીઝ’
એક તો ઓછું પેટ્રોલ છે
ઉપરથી વધતા ભાવ છે !
***
ખુશ્બુ છે હજી બાકી
જો સુંઘી શકો તો…
હું કોઈ બોતલ નથી
સ્કુટરની ખાલી ટાંકી છું !
***
ના માગ ખુદા પાસે
ગજાથી મોટો વૈભવ…
એક કાર એવી દેશે
તું ચલાવી નહીં શકે !
***
કહેવાને કાજે આમ
અમે ‘ઓડી’ તો લીધી
પછી એમાં બેસીને
ચા અડધી જ પીધી !
***
મહેનત વગર ‘મરીઝ’
દેવાદાર થઈ ગયા
ગાડી અમારી બેન્કે
પાછી જો લઈ લીધી !
***
છે એક પેટ્રોલની વ્યથા
બીજો ‘વેટ’નો માર છે
કાર હો કે બાઈક
બન્ને ‘દર્દ’ના પ્રકાર છે !
***
હતાં કંઈ ‘લુના’ પણ એવાં
પેટ્રોલ-પંપેથી જો નીકળ્યાં
કોઈ જુએ તો, જલે કે
ચાલ્યાં ટાંકી ‘ફૂલ’ કરીને !
***
પેટ્રોલ અને ઝહેરમાં
સંતાપ એ જ છે…
એક પણ હવે ‘મરીઝ’
માપસર નથી મળતું !
***
હરો ફરો ગમે ત્યાં
લાંબી સફર કરો
સગવડ જો સાચી પૂછો
હવે સાઈકલમાં જ છે !
***
- મન્નુ શેખચલ્લી
Comments
Post a Comment