આ રવિવારે ગુજરાતની પાંચ મહાનગરપાલિકાની ચૂંટણી છે.
એક બાજુ ઉમેદવારો માટે સ્કુલમાં આવતી ‘સરપ્રાઇઝ ટેસ્ટ’ જેવું છે તો બીજી બાજુ અમુક લોકોને રવિવારે સરપ્રાઇઝ લાગશે કે હેં ? અલ્યા, આજે વળી કઈ ચૂંટણી ?
એ તો ઠીક, અમુક મતદારોને તો રીઝલ્ટ આવશે ત્યારે સરપ્રાઇઝ થશે કે હેં ? અલ્યા, ક્યારે થઈ ગઈ ચૂંટણી ?
એક બાજુ સટોડિયાઓ ભાવ પાડી રહ્યા છે કે કોને કેટલી સીટો મળશે, તો બીજી તરફ અમે અમુક ચોક્કસ અને અફર આગાહીઓ કરવાના મૂડમાં છીએ…
***
આગાહી (1)
આ વખતે (દર વખતની જેમ) મોટા ભાગના ઉમેદવારોનાં નામ લોકોને ખબર જ નહીં હોય !
***
આગાહી (2)
આ વખતે (દર વખતની જેમ) કોંગ્રેસ તથા ભાજપ બંનેને બળવાખોરોની સમસ્યા સતાવી રહી હશે !
***
આગાહી (3)
આ વખતે (દર વખતની જેમ) ચૂંટણી પહેલાં જ ફૂટી ગયેલા કોંગ્રેસીઓને લીધે ભાજપ અમુક બેઠકો બિનહરીફ રીતે જીતી જશે !
***
આગાહી (4)
આ વખતે (શિયાળો હોવાથી) અમુક ગરીબ મતદારો એ ભ્રમમાં હશે કે એમને મફત ધાબળા મળી જશે !
***
આગાહી (5)
આ વખતે (દર વખતની જેમ) ઝુંપડપટ્ટીના અનેક મતદારો દારૂ પીધા પછી ભૂલી જશે કે સાલું, કોને વોટ આપવાનો હતો ?
***
આગાહી (6)
...અને આ વખતે (દર વખતની જેમ) હારેલી કોંગ્રેસ ફરિયાદ કરશે કે EVM મશીનમાં ગડબડો થઈ છે અને મતદાર યાદીમાં નામો ગુમ થયા છે !
***
- મન્નુ શેખચલ્લી
Comments
Post a Comment