'કોંગ્રેસ સાયન્સ'ના નિયમો !

બોલો, ‘ઇન્ડિયન સાયન્સ કોંગ્રેસ’ નામની પણ એક સંસ્થા છે !

એનું 108મું અધિવેશન 3 થી 7 જાન્યુઆરીએ થવાનું હતું પણ હાલમાં મોકુફ રહ્યું છે. જોકે કોંગ્રેસ પાર્ટી સાથે તેને કોઈ લેવાદેવા નથી છતાં જોવાની વાત એ છે કે ‘કોંગ્રેસ’નું પણ એક અલગ ‘સાયન્સ’ છે !

એના નિયમો પણ અનોખા છે…

***

નિયમ (1)

આંખ આડા કાન કરવાથી પાર્ટીના પ્રશ્નો એની મેળે ગાયબ થઈ જાય છે.

***

નિયમ (2)

પ્રશ્નો લોકોના હોય કે પાર્ટીના હોય, એ બાબતે ‘કશું ન કરવું’ એ જ ‘શ્રેષ્ઠ કાર્ય’ ગણાય છે.

***

નિયમ (3)

કોંગ્રેસ પાર્ટી એક એવું મોટું તળાવ છે જેમાં મોં ખોલનારા ડૂબી જાય છે અને મોં બંધ રાખનારા ઉપર આવતા જાય છે.

***

નિયમ (4)

કોંગ્રેસમાં જે કંઈ સારું છે તે ગાંધી પરિવારને કારણે છે અને જે કંઈ ખરાબ છે તેની ગાંધી પરિવારને ખબર જ નથી.

***

નિયમ (5)

જે વિજ્ઞાનના નિયમ મુજબ ભારતમાં ડ્રાઈવર વિનાની ટ્રેન ચાલુ થઈ છે એ નિયમની શોધ કોંગ્રેસે વરસો પહેલાં કરીને પ્રમુખ વિના આખી કોંગ્રેસ ચલાવી છે.

***

નિયમ (6)

માત્ર ચૂંટણીના સમયે જ લોકો તથા મિડિયા સામે હાજર રહેવું. ત્યાર પહેલાં અને ત્યાર પછી છુપાયેલા રહેવાથી જ સલામત રહી શકાય છે.

***

નિયમ (7)

અહીં ગાંધી પરિવાર સિવાય બીજા પરિવારોને પણ છૂટ છે. જેમ કે ‘ગડા પરિવાર’ ‘મલ્હોત્રા પરિવાર’ ‘સ્ટાર પરિવાર’… વગેરે.

***

નિયમ (8)

કોંગ્રેસને દસ જ વસ્તુઓ એકજુટ રાખી શકે છે.
1 થી 9… ગાંધી પરિવાર
અને 10, જનપથ !

***

- મન્નુ શેખચલ્લી