2020નું વરસ જે રીતે વીત્યું છે એના વિશે લાંબી લાંબી અનેક દુઃખભરી દાસ્તાનો માંડી શકાય પરંતુ માત્ર એક એક વાક્યમાં પણ આખા વરસનો અનુભવ કહી શકાય ! જુઓ…
***
‘હેપ્પી ન્યુ યર’થી શરૂ થયું અને ‘નોટ વેરી હેપ્પી યર’થી પુરું થયું.
***
શરૂઆત શાહીન બાગથી થઈ અને સમાપ્તિ સિંધુ બોર્ડર ઉપર આવી.
***
માવા માટે ડંડા ખાધા અને પછી માસ્ક વિના દંડ ભર્યા.
***
ન્યુઝ જોઈ જોઈને ડરતા રહ્યા અને મેસેજો વાંચી વાંચીને હસતા રહ્યા…
***
ચીનનું ટિક-ટોક બાન થયું, પત્નીની ટક-ટક બમણી થઈ ગઈ.
***
ટીવીમાં રામાયણ અને ઘરમાં મહાભારત !
***
રામાયણમાં પુષ્પક વિમાનને જોયું અને શિલાન્યાસમાં સાહેબના વિમાનને જોયું.
***
અડધું વરસ ઘરમાં ગયું, ને બહાર નીકળ્યા તો માસ્ક નડ્યું !
***
અક્ષયને ‘લક્ષ્મી’ ફળી નહીં, સોનુને સૂદમાં (વ્યાજમાં) વાહ વાહ મળી.
***
સુશાંતનું સસ્પેન્સ ખુલ્યું નહીં, ડ્રગ્સનું ડિંડક પત્યું નહીં.
***
કંગનાનો કકળાટ ચાલુ રહ્યો, રિયાના રૂદનથી એને ફિલ્મો મળી ! બોલો.
***
સૌ ઘેર બેઠાં ગંગા ન્હાયા, એમાં ગંગાના પાણી ચોખ્ખાં થયાં !
***
સરવાળે, ટ્વેન્ટી ટ્વેન્ટીએ આપણી ‘ટેસ્ટ’ લીધી !
એમાં જે ‘પોઝિટીવ’ નીકળ્યા એમની સાથે જ ‘નેગેટિવ’ થયું ! કેવું કહેવાય, નહીં ?
***
- મન્નુ શેખચલ્લી
Comments
Post a Comment