બે ટાઈપનાં ટ્વિટર યુધ્ધો !

સરહદ ઉપર સૈનિકો લડે અને બોમ્બ ધડાકા થાય એ જમાનો ગયો ! હવે તો નાનકડાં ટ્વિટરમાં જંગ જામે છે. આના બે પ્રકાર જોવા મળ્યા છે…

***

ટાઈપ A યુધ્ધ

એક અભિનેત્રી અઢી સેન્ટિમીટર બાય સાડા ત્રણ સેન્ટિમીટર સાઈઝમાં 30-40 શબ્દોમાં આકરી ટીકા કરવા લાગે છે.

***

જવાબમાં એક નેતા અઢી સેન્ટિમીટર બાય સાડા ત્રણ સેન્ટિમીટર સાઈઝમાં એટલા જ શબ્દોમાં તેના કરારા જવાબ આપવા માંડે છે.

***

હોબાળો મચે છે. તેથી આખી ધાંધલ ધમાલ 32 ઇંચથી 48 ઇંચ સુધીના ટીવીમાં પહોંચે છે. જ્યાં 3 ઇંચ બાય 4 ઇંચના ચોખંડામાં બેઠા બેઠા અડધો ડઝન લોકો શોરબકોર મચાવી દે છે.

***

જેના પરિણામે સવા ફૂટ બાય અઢી ફૂટની સાઇઝના અખબારોમાં હેડલાઈન બનવા માંડે છે.

***

છેવટે વિવાદ એટલો વકરે છે કે  3400 સ્કેવર ફીટના બાંધકામને બુલડોઝર વડે તોડી પાડવામાં આવે છે !!

***

ટાઈપ B યુધ્ધ

અહીં 50,362 સ્ક્વેર કિલોમીટર વિસ્તારના એક રાજ્યમાં એક આંદોલન શરૂ થાય છે.

***

જ્યાંથી આશરે 10,000 લોકો આશરે 500 વાહનો સાથે નીકળીને આશરે 250 કિલોમીટર દૂર આવેલા બીજા શહેરના નાકે પહોંચે છે.

***

જ્યાં તેમને આંદોલન કરવા માટે આશરે 3000 સ્ક્વેર મીટરનું મેદાન ફાળવવામાં આવે છે. જેને તેઓ નકારી કાઢે છે.

***

એમાં હવે પેલી અભિનેત્રી અઢી સેન્ટિમીટર બાય સાડા ત્રણ સેન્ટિમીટર સાઈઝમાં ટીકાઓ કરવા માંડે છે...

***

જવાબમાં એક ગાયક પણ એટલી અમથી જગામાં  
કરારો જવાબ આપે છે…

જેનો હોબાળો ટીવીમાં…

જેની નોંધ અખબારોમાં…

ફરી ચાલ્યું ચક્કર !

***

- મન્નુ શેખચલ્લી