જાન્યુઆરીમાં શાળા-કોલેજો તો શરૂ નહીં થાય પરંતુ થોડા મહિનામાં સરકારી ઓફીસોમાં એક તૃતિયાંશને બદલે ફૂલ હાજરી શરૂ થવાની છે.
ટુંકમાં, ‘ઘેરબેઠાં કામ વિના - ઘેરબેઠાં પગાર’ની સ્કીમ બંધ થવાની છે !
તો હવે સરકારી ઓફિસોમાં કેવી સુચનાઓ લખેલી હશે ?
***
દિવાલો ઉપર લખ્યું હશે :
‘અહીં બુકાની બાંધીને બેસેલા માણસો સરકારી કર્મચારી છે. આતંકવાદી નથી. કૃપા કરીને માનવતાના ધોરણે પેશ આવો.’
***
કોઈ ખૂણે ઝીણા અક્ષરે લખ્યું હશે :
‘કાગળ દ્વારા કોરોના વાયરસ ફેલાતો નથી. આપની લાંચ બેફિકર બનીને કેશ દ્વારા આપી શકો છો !’
***
એ જ સુચના નીચે બીજી સુચના હશે :
‘લાંચ આપતાં પહેલાં કર્મચારીનું માસ્ક દૂરથી ઉતરાવીને ચહેરાની ખાતરી કરી લેવી. પાછળથી કોઈ ફરિયાદ ચાલશે નહીં !’
***
ઓફિસના વોશ-બેઝિન પાસે સુચના :
‘વારંવાર હાથ ધોવા જરૂરી છે પરંતુ આ વોશ-બેઝિન તથા આ બાથરૂમ ક્યારે ધોવાય છે તેની લેખિત ખાતરી માગવી નહીં !’
***
દિવાલો ઉપર લાલ અક્ષરે લખ્યું હશે :
‘અહીં વિના કારણે છીંક ખાનારની ધરપકડ કરવામાં આવશે !’
***
ઓફિસમાં દાખલ થતાં સુચનાઓ :
‘સિક્યોરીટી સ્ટાફ ધ્યાન આપે. મુલાકાતીનું ટેમ્પરેચર માપ્યા બાદ ખિસ્સાં પણ ચેક કરવાનાં છે. જો કોઈના ખિસ્સામાંથી છીંકણીની ડબ્બી નીકળે તો ‘બોમ્બ’ સમજીને તેની ધરપકડ કરવાની છે !’
***
એ જ દરવાજે બીજી સૂચના :
‘બહાર જતા મુલાકાતીનું ટેમ્પરેચર માપવાનું નથી. સરકારી ઓફિસની મુલાકાત બાદ બધાની ખોપડી ગરમ જ હોય છે !’
***
- મન્નુ શેખચલ્લી
Comments
Post a Comment