મોસમ વિભાગે ચેતવણી આપી છે કે ઠંડીનું મોજું આવી રહ્યું છે માટે હાથનું મોજું અને પગનું મોજું હાથવગું રાખજો !
વળી, આવનારા શિયાળામાં જાતજાતનું બનવાનું છે…
***
ગુસ્સા વિના પણ દાંત કકડશે…
આવી રહ્યો છે શિયાળો !
***
તન ઘરમાં હશે પણ મન આબુમાં હશે…
આવી રહ્યો છે શિયાળો !
***
માસ્ક પણ હવે વૂલન હશે…
આવી રહ્યો છે શિયાળો !
***
મામૂલી શરદી ખાંસીથી પણ ડર લાગશે…
આવી રહ્યો છે શિયાળો !
***
પોલીસ (અલગથી) મેથીપાક ચખાડશે અને સરકાર (નવેસરથી) ઉકાળશે…
આવી રહ્યો છે શિયાળો !
***
મોર્નિંગ વોકથી ચરબી ઘટશે પણ ભૂખ લાગવાથી ફરી પેટ વધશે…
આવી રહ્યો છે શિયાળો !
***
બનિયાન ઉપર શર્ટ, ઉપર સ્વેટર, ઉપર જાકીટ, પહેરી પાતળાઓ પણ લાગશે જાડા…
આવી રહ્યો છે શિયાળો !
***
જેમ જેમ ‘પારો’ નીચે જશે, તેમ તેમ ‘દેવદાસો’ ઉપર આવશે…
આવી રહ્યો છે શિયાળો !
***
મુફલિસો અને કડકાઓ તો ઠીક, અંબાણી અને અદાણી પણ ખાલી હાથ ઘસતા બેઠા હશે…
આવી રહ્યો છે શિયાળો !
***
અને પત્ની ભલે છૂટી જાય, પણ રજાઈ છોડવાનું મન નહીં થાય…
આવી રહ્યો છે શિયાળો !
***
- મન્નુ શેખચલ્લી
Comments
Post a Comment