ફરી પાછો કોરોના વાયરસનો વિસ્ફોટ થયો અને ફરી પાછો શહેરોમાં કરફ્યુ લાગવા માંડ્યો ! આજકાલ ટીવી ન્યુઝ જુઓ કે છાપાં ખોલીને વાંચો તો એમ થાય છે કે ‘સાલું, બધા જુના સમાચારો રિ-મિક્સ થઈને પાછા આવી રહ્યા છે કે શું ?’ જુઓ નમુના…
***
મુખ્યમંત્રીશ્રીએ કહ્યું છે કે અફવાઓથી ગભરાટમાં આવી જવાની જરૂર નથી. સરકારે બધી જ વ્યવસ્થા ગોઠવી જ છે.
***
કોંગ્રેસે આક્ષેપ કર્યો છે કે સરકાર સાચા આંકડાઓ છૂપાવી રહી છે…
***
લોકોએ કર્યો ધસારો… બજારોમાં ઉમટી ભીડ… મોલની બહાર લાગી લાઈનો… (યાદ કરો, માર્ચ ૨૦૨૦)
***
સોશિયલ ડિસ્ટન્સના ફરી ધજાગરા ઉડ્યા… (આ તો પંચાવન વાર રિપિટ થયા.)
***
શાકભાજી બમણા અને ત્રણ ગણા ભાવે વેચાયાં… (સાતમી વાર)
***
પાન મસાલાના શોખીન બંધાણીઓએ ‘બફર’ સ્ટોક ભેગો કરવા માટે ગલ્લાઓ ઉપર ધસારો કર્યો… (અગાઉ કરેલી ભૂલમાંથી બોધપાઠ લીધો છે !)
***
પાકિસ્તાને ફરી સરહદ પારથી તોપમારો કર્યો.. ત્રણ નાગરિક તથા છ જવાન ઘાયલ.. આર્મીએ ચાર આતંકવાદીઓને ઠાર માર્યા…
(સોરી, આ કોરોનાનું નથી પણ રિપિટ તો છે જ ને ?)
***
ચૂંટણીઓમાં થયેલી હાર પછી કોંગ્રેસની નેતાગિરીમાં છવાયેલી હતાશા…
નાણામંત્રીએ નવું આર્થિક પેકેજ જાહેર કર્યું…
(ઉપરના બન્ને સમાચારો હજી બે ચાર વાર રિપિટ થશે. કટિંગો સાચવી રાખજો.)
***
હાઈકોર્ટે રાજ્ય સરકારનો ઉધડો લીધો… પંદર દિવસમાં રિપોર્ટ આપવાનો હુકમ કર્યો…
(આ સમાચાર ટુંક સમયમાં રિપિટ થશે, રાહ જુઓ.)
***
અને હા, કોરોનાના કેસની સંખ્યા ફરી ‘જુન-જુલાઈના’ સ્તરે પહોંચી ગઈ છે… જોયું ?!
***
- મન્નુ શેખચલ્લી
Comments
Post a Comment