હવે જ્યારે ‘વર્ક ફ્રોમ હોમ’ની જેમ ‘ગરબા ફ્રોમ હોમ’ કરવાનું જ છે ત્યારે ઓનલાઇન ગરબામાં શું ફક્ત ડ્રોઇંગરૂમમાં જ સાદી રીતે પતાવી દેવાના છે ?
ના ભઇ ના, અમારી પાસે ઓનલાઈન ગરબાનાં નવાં નવાં સ્ટેપ્સ છે !....
***
પાટલા ગરબા
જે રીતે એક જમાનામાં અમુક બહેનો માત્ર એક જ થાળી ઉપર પગ ગોઠવીને ગરબાના કરતબ બતાડતી હતી એ રીતે તમે થાળી ઉપરાંત પાટલા ઉપર પણ ગરબા કરી શકો છો !
***
સોફા ગરબા
ગરબાના મેદાનમાં તો બહુ ઠેકડા મારતા હતા હવે ડ્રોઈંગરૂમમાં ક્યાં ઠેકડા મારશો ? તો જવાબ છે સોફામાં ! યાર, પોચા સરસ મઝાના સોફા હમણાં નહીં તો ક્યારે કામમાં આવશે ?
અહીં તો ઉછળી ઉછળીને પીઠ ઉપર પણ પડી શકાય છે… ફરી ઉછળવા માટે !
***
લીસ્સા ફ્લોર ગરબા
લીલી પ્લાસ્ટિકની ચાદરો ચોંટાડેલા મેદાનો કરતાં આપણા ડ્રોઇંગરૂમના લીસ્સા ફ્લોરની ખાસિયત જ અલગ છે ! અહીં તમે લસરી શકો છો ! લીસ્સા ટાઈલ્સ ઉપર નવાં નવાં સ્ટેપ્સ શોધી કાઢો… જેમ કે, ફાસ્ટ સ્પીડમાં આવીને બે પગે લપસી પડવાનાં સ્ટેપ ! અથવા, બેઠાં બેઠાં જ ગોળ ગોળ ચકરડી ભમ્મરડી ફરવાનાં સ્ટેપ !
***
સેલ્ફી સ્ટેપ
ગરબે રમતાં રમતાં પોતાની સેલ્ફીનો જ વિડીયો ઉતારો ! એનાથી પણ સારાં સ્ટેપ કરવાં હોય તો બન્ને હાથમાં મોબાઈલો પકડીને બે એંગલથી સેલ્ફી વિડીયો શૂટ કરો !
***
સેલ્ફી-સ્ટીક સ્ટેપ
માત્ર હાથમાં શા માટે, સેલ્ફી સ્ટીકમાં મોબાઇલ ફીટ કરીને ગરબા રમોને ! આમાં તો બે જણા સામસામી સેલ્ફી-સ્ટીકો વડે ડાંડીયા પણ રમી શકે !
ટ્રાય કરીને વિડીયો મુકજો ! જય માતાજી.
***
- મન્નુ શેખચલ્લી
Comments
Post a Comment