કોણે કેવું માસ્ક પહેર્યું છે અને માસ્ક પહેર્યા પછી કોણ કેવી હરકતો કરે છે… એનું ધ્યાનથી અવલોકન કરવાથી શું શું જાણવા મળે છે ?
***
જેણે પોતાના ચહેરા કરતાં મોટું માસ્ક પહેર્યું હોય તેણે કદાચ પોતાના બાપાનું માસ્ક પહેર્યું હશે !
***
જેણે સાવ નાનું માસ્ક પહેર્યું હોય તેને એ માસ્ક બાળકના ડાઈપર સાથે ફ્રીમાં મળ્યું હશે !
***
જે માણસ વારંવાર પોતાનું માસ્ક એડજસ્ટ કર્યા કરતો હોય તેને અંદર પોતાની મૂછ નડતી હશે !
***
જે માણસ માસ્ક પહેરવા છતાં પોતાનું નાક ખુલ્લું રાખે છે તેને જ કદાચ શ્વાસ લેવામાં તકલીફ પડતી હશે ! (એનાથી આઘા રહો.)
***
જેના માસ્ક ઉપર તમને ઘેરા લાલ અથવા બ્રાઉન કલરના ડાઘા દેખાય એનાથી પણ આઘા રહો… કારણ કે એને વારંવાર માવાની પિચકારી મારવાની ટેવ હશે !
***
માસ્ક પહેરતાંની સાથે જેના ચશ્મા ઊંચા ચડી જાય છે તેના માસ્કનું ઇલાસ્ટિક ચશ્માની દાંડીમાં ભરાઈ જતું હશે !
***
જે માણસ ફક્ત ટ્રાફિક સિગ્નલ પાસે આવીને જ માસ્ક પહેરે છે તે પોતાની જાતને કોરોનાથી નહી, પોલીસથી બચાવી રહ્યો છે !
***
જેણે કેસરિયા રંગનું માસ્ક પહેર્યું છે તે રામભક્ત હોઈ શકે છે.
અને જેણે લીલા રંગનું માસ્ક પહેર્યું છે તે કોઈ હોસ્પિટલના ઓપરેશન થિયેટરમાંથી ચોરેલું હોઈ શકે છે ! (બધા કલર કોમવાદી ના હોય.)
***
… અને જેણે કાળા કલરનું માસ્ક પહેર્યું હોય તેના પેટમાં ગડબડ હોઈ શકે છે કારણ કે કાળો રંગ ‘મેલખાઉ’ હોય છે ! હીહીહી….
***
- મન્નુ શેખચલ્લી
Comments
Post a Comment