59 એપ ઉપર પ્રતિબંધ મુકાયા પછી, એનું લિસ્ટ વાંચ્યા પછી અને બીજે ક્યાં ક્યાં ચાઈનિઝ રોકાણો છે એ જાણ્યા પછી અમે તો ડઘાઈ ગયા છીએ !
અમારી હાલત કંઈક આવી છે…
***
જેને તાકો સમજીને
રાખ્યો હતો તેમાંથી
‘કટ-પિસ’ નીકળશે…
કોને ખબર હતી
કે અહીં ચોતરફ
આટલું બધું
ચાઈનિઝ નીકળશે !
***
ભારતીય સાડી-બ્લાઉઝમાં
ધારી હતી જેને,
તે સન્નારી ગ્લેમરસ
‘વન-પિસ’ નીકળશે…
કોને ખબર હતી
કે અહીં ચોતરફ
આટલું બધું
ચાઇનિઝ નીકળશે !
***
પનીર-ટિક્કામાંથી
નકરું ‘ચીઝ’ નીકળશે…
‘ક્યા ચીજ’ લાગતી જાનુ
'ના-ચીજ' નીકળશે…
સો ટકા ગેરંટીઓ
‘ઓગણીસ-વીસ’ નીકળશે…
મશાલોના પેકિંગમાંથી
‘માચિસ’ નીકળશે…
કોને ખબર હતી
કે અહીં ચોતરફ
આટલું બધું
ચાઈનિઝ નીકળશે !
***
શુધ્ધ દેશી ભોજન
ઓન-લાઈન મંગાવી ખાધું
શુધ્ધ ભારતીય રૂપિયા
ઓન-લાઈન ચૂકવી દીધા
પછી પડી ખબર
કે આખી લેણ-દેણમાં
કંઈક ‘ચાઇનિઝ’ હતું !
થવું હતું સ્વદેશી
સ્વદેશી ના રહ્યા !
કોને ખબર હતી
કે અહીં ચોતરફ
આટલું બધું
ચાઇનિઝ નીકળશે !
***
- મન્નુ શેખચલ્લી
Comments
Post a Comment