કહે છે કે જો સ્કુલો શરૂ થશે તો એમાં 'ઓડ-ઈવન' સિસ્ટમ હશે ! મતલબ કે સોમવારે પહેલા ધોરણવાળા તો મંગળવારે બીજા ધોરણવાળા ભણવા જશે. એ તો ઠીક છે, પણ પછી શું શું થશે ?
***
સવાલ : સ્કુલ-રીક્ષાવાળા જે ઘેટા-બકરાંની જેમ બાળકોને ભરે છે એનું શું?
જવાબ : કંઈ નહિ, એક દિવસ રીક્ષામાં ‘ઘેટાં’ ભરશે અને બીજા દિવસે ‘બકરાં’ !
***
સવાલ : સ્કુલમાં જો બાળકોને સોશિયલ ડિસ્ટન્સ પ્રમાણે બેસાડવાનાં હોય તો ક્લાસો કેવી રીતે લેવાના ?
જવાબ : એક ક્લાસમાં ટિચર ‘લાઈવ’ હશે અને બીજા ક્લાસમાં ‘ટેલિકાસ્ટ’ હશે !
***
સવાલ : પેલા ‘પ્રવેશોત્સવ’નું શું થશે ?
જવાબ : એના બદલે ‘ગૃહ પ્રવેશોત્સવ’ થશે !
***
સવાલ : અને ‘ગુણોત્સવ’ ?
જવાબ : બે વડે ભાગો… ‘ભાગોત્સવ’ !
***
સવાલ : આમાં ને આમાં અડધો જ કોર્સ પતશે તો ?
જવાબ : ચિંતા ના કરો. એક્ઝામનાં પેપરો પણ ઓડ-ઈવન હશે. એક સવાલનો જવાબ આપવાનો, બીજાનો નહીં આપવાનો !
***
સવાલ : પણ સ્કુલવાળા ફી તો આખેઆખી લઈ લેશે. એનું શું ?
જવાબ : તમારે તમારું બાળક આખેઆખું રાખવું છે કે કોર્સ ?
***
સવાલ : આમ તો આખેઆખું શિક્ષણ ડબલ નફાનો ધંધો બની જશે, એનું શું ?
જવાબ : 40 વરસ જુનો સવાલ છે. હવે તો એ સવાલ સિલેબસમાં જ નથી !
***
- મન્નુ શેખચલ્લી
Comments
Post a Comment